2020-yilda koronavirus pandemiyasi oqibatida aviakompaniyalarning sof foydasi 84 milliard dollarga qisqaradi. Bu haqda Xalqaro havo transporti assotsiatsiyasi (IATA) prognozida ma’lum qilingan.
Aviakompaniyalarning foydasi 50 foizga pastlaydi va 2019-yildagi bilan taqqoslaganda 838 milliard dollarlik daromad 419 milliardgacha tushib ketadi. 2021-yilda ham avvalgi ko‘rsatkichlarni tiklab bo‘lmaydi. IATA prognoziga ko‘ra, aviakompaniyalar kelasi yili 598 milliard dollar daromad qilishi mumkin.
“Moliyaviy jihatdan olib qaraganda, 2020-yil aviatsiya tarixidagi eng yomon davr bo‘ladi”, — deydi IATA rahbari Aleksandr de Jyunyak.
Shuningdek, u aviaqatnovlar sanoati kuniga 230 million dollar yo‘qotayotganini ham qo‘shimcha qilgan.
Mavzuga doir:
Eslatib o‘tamiz, 2020-yil 16-mart kuni Uzbekistan Airways mahalliy va xalqaro aviaqatnovlarni bekor qilgan, keyinchalik bekor qilingan reyslar uchun chiptalarni topshirishda jarimalar va sanksiyalar bo‘lmasligini bildirgan. 2-mayda Uzbekistan Airways ijroiya organiga O‘zbekiston tashqi iqtisodiy faoliyat milliy bankidan olingan 111 million AQSh dollari miqdoridagi kredit to‘lovini 2020-yilda vaqtincha to‘xtatib turish masalasini ko‘rib chiqish topshirilgan. Qaror yagona aksioner — davlat tomonidan 30-aprelda qabul qilingani haqida xabar berilgan. Karantin choralarini yengillashtirish doirasida 18-maydan boshlab O‘zbekistonning bir qator shaharlariga avia va temiryo‘l qatnovlari qayta tiklandi.
O‘zbekiston Prezidenti Shavkat Mirziyoyev 2020-yil 25-may kuni transport sohasining barqaror ishlashini ta’minlash va izchil rivojlantirish masalalari bo‘yicha o‘tkazgan yig‘ilishida karantindan eng ko‘p zarar ko‘radigan Uzbekistan Airways va Uzbekistan Airports aksiyadorlik jamiyatlarining 122 million dollar kreditlari to‘lov muddatlari uzaytirilgani, 60 milliard so‘mlik soliq imtiyozlari taqdim etilgani, inqirozga qarshi kurashish jamg‘armasidan 50 million dollar miqdorida aylanma mablag‘ sifatida foizsiz ssudalar ajratilgani ma’lum qilindi. Shuningdek, O‘zbekistondagi 4 ta aeroportni davlat-xususiy sheriklikka, Uzbekistan Airways’ni xorijiy kompaniya boshqaruviga berish rejalashtirilgani aytildi.
28-mayda Uzbekistan Airways kompaniyasi “Mi-8MTV-1” rusumli ikkita vertolyotni, “TV3-117 VM” rusumli sakkizta va “VSU AI-9V” rusumli uchta aviatsion dvigatelni sotuvga qo‘ygani xabar qilindi.
Izoh (0)