Konor Makgregor taqdiridan nolimasligi va raqiblar yetishmasligidan shikoyat qilmasligi kerak, boisi u Jeksonvilldagi UFC 249 musobaqasida Toni Fergyusonga qarshi jangda Habib Nurmagomedning o‘rnini egallashni xohlamagan. Bu haqda UFC prezidenti Deyna Uayt ESPN nashriga bergan intervyusida ma’lum qildi.
“U Getji bilan jang qilmoqchi, ammo Getji yaqindagina g‘alaba qozondi va Habib bilan jang qilish huquqini qo‘lga kiritdi. Konorda esa Habib — Toni jangidagi bo‘sh joyni egallash imkoniyati bor edi, ammo u o‘shanda shunday degandi: ‘Men zaxiradagi jangchi emasman va buni qilmayman’.
Agar u jangni qabul qilganida, hozir Jastinning o‘rnida bo‘lishi mumkin edi. U bunday qilmadi, Jastin esa bunga rozi bo‘ldi va endi Habib bilan jang qiladi. Hozir Konorning ta’bi xira, chunki hamma narsa uning xohish-istaklariga teskari bo‘lmoqda, biroq biz u xohlayotgan narsalarni qila olmaymiz”, — deydi Uayt.
Eslatib o‘tamiz, o‘tgan hafta oxirida Konor Makgregor UFC rahbariyati unga Jastin Getjiga qarshi titul jangini bermagani va o‘zi uchun boshqa munosib raqibni ko‘rmayotgani sababli faoliyatini yakunlaganini e’lon qilgandi.
Mavzuga doir: Habibning menejeri faoliyatini yakunlagan Konorga: Sen yillar davomida Toni Fergyusondan qochib yurding
Tasdiqlanmagan ma’lumotlarga ko‘ra, Habib Nurmagomedov va Jastin Getji o‘rtasidagi chempionlik jangi 19-sentabr kuni UFC 253 da bo‘lib o‘tadi.
Izoh (0)