Конор Макгрегор тақдиридан нолимаслиги ва рақиблар етишмаслигидан шикоят қилмаслиги керак, боиси у Жексонвиллдаги UFC 249 мусобақасида Тони Фергюсонга қарши жангда Ҳабиб Нурмагомеднинг ўрнини эгаллашни хоҳламаган. Бу ҳақда UFC президенти Дэйна Уайт ESPN нашрига берган интервьюсида маълум қилди.
«У Гэтжи билан жанг қилмоқчи, аммо Гэтжи яқиндагина ғалаба қозонди ва Ҳабиб билан жанг қилиш ҳуқуқини қўлга киритди. Конорда эса Ҳабиб — Тони жангидаги бўш жойни эгаллаш имконияти бор эди, аммо у ўшанда шундай деганди: ‘Мен захирадаги жангчи эмасман ва буни қилмайман’.
Агар у жангни қабул қилганида, ҳозир Жастиннинг ўрнида бўлиши мумкин эди. У бундай қилмади, Жастин эса бунга рози бўлди ва энди Ҳабиб билан жанг қилади. Ҳозир Конорнинг таъби хира, чунки ҳамма нарса унинг хоҳиш-истакларига тескари бўлмоқда, бироқ биз у хоҳлаётган нарсаларни қила олмаймиз», — дейди Уайт.
Эслатиб ўтамиз, ўтган ҳафта охирида Конор Макгрегор UFC раҳбарияти унга Жастин Гэтжига қарши титул жангини бермагани ва ўзи учун бошқа муносиб рақибни кўрмаётгани сабабли фаолиятини якунлаганини эълон қилганди.
Мавзуга доир: Ҳабибнинг менежери фаолиятини якунлаган Конорга: Сен йиллар давомида Тони Фергюсондан қочиб юрдинг
Тасдиқланмаган маълумотларга кўра, Ҳабиб Нурмагомедов ва Жастин Гэтжи ўртасидаги чемпионлик жанги 19 сентябрь куни UFC 253 да бўлиб ўтади.
Изоҳ (0)