Ўзбекистоннинг Россиядаги элчихонаси 2020 йил 14 май куни ишга туширилган ва қийин вазиятга тушиб қолган ватандошларга бир марталик молиявий ёрдам тўлашни кўзда тутадиган «Меҳр» лойиҳаси томонидан 6 июнь ҳолатига кўра, 2428 нафар Ўзбекистон фуқароси 14 935 076 рубль (тахминан, 218 минг доллар) миқдорида молиявий ёрдам олди. Бу ҳақда Ўзбекистон Ташқи ишлар вазирлиги хабар берди.
Маълум қилинишича, дипломатик ваколатхона 25 мартдан 28 майгача Москва шаҳрида ўта қийин вазиятда қолган Ўзбекистон фуқароларининг яшаш ва озиқ-овқати учун жами 6 700 560 рубль (тахминан, 100 минг доллар) тўлаган. Шу каби чоралар Россиянинг бошқа шаҳарларида жойлашган бош консулхоналар томонидан ҳам амалга оширилмоқда.
Мавзуга доир: Карантин сабабли Россиядаги 1000 нафардан ортиқ ўзбекистонлик талабага ёрдам кўрсатилди
ТИВ томонидан билдирилишича, Ўзбекистоннинг элчихоналари ва консуллик муассасалари коронавирусга қарши курашда инсонпарварлик ёрдами ва техник кўмак жалб қилиш учун мақсадли ишларни амалга оширди.
10 апрель куни Ўзбекистоннинг АҚШдаги дипломатик ваколатхоналари ташаббуси билан ва диаспора ташкилотлари кўмагида «Биз Ўзбекистонга бефарқ эмасмиз» номли хайрия акцияси бошланди. Акция доирасида 28 май ҳолатига кўра, 61 675 доллар миқдоридаги маблағ йиғилиб, «Меҳр-шафқат ва саломатлик» жамоат фондининг махсус ҳисоб рақамига ўтказилди. Маблағ йиғиш давом этмоқда.
Ўзбекистоннинг Германиядаги элчихонаси ҳам «Куч бирликда» хайр-саховат акцияси ташаббуси билан чиқди. Йиғилган маблағлар ҳисобидан 705 та оилага қарийб 10 минг евро миқдорида ёрдам кўрсатилди. Ўзбекистоннинг Жанубий Кореядаги элчихонаси томонидан хайрия маблағларини йиғиш бўйича олиб борилган ишлар натижасида 100 минг доллардан ортиқ маблағ Жамоатчилик фонди ҳисоб рақамига ўтказилди.
Ўзбекистоннинг Лондондаги элчихонаси томонидан Буюк Британиянинг BAT компанияси томонидан 2 миллиард сўм пул ўтказилиши ва сунъий нафас олдириш аппаратларини харид қилиш учун 200 минг доллар миқдоридаги маблағ ажратилиши масаласи ҳал қилинди. Анқара шаҳридаги элчихона Ўзбекистонга 50 дона ўпкани сунъий нафас олдириш аппаратини беғараз асосда етказиб беришни ташкил қилди.
Вазирлик ва Ўзбекистоннинг чет элдаги дипломатик ваколатхоналари ҳаракатлари натижасида «Меҳр-шафқат ва саломатлик» жамоат фондининг ҳисоб рақамига деярли 250 минг доллар ўтказилди. Шунингдек, чет элдаги дипломатик ваколатхоналар ёрдамида тиббий жиҳозлар олиш учун 400 минг доллардан кўпроқ маблағ, шахсий ҳимоя ва гигиена воситалари, тиббий асбоблар ва буюмлар кўринишидаги бир неча юз тонна инсонпарварлик ёрдами Ўзбекистонга жалб қилинди.
Қайд этилишича, хорижий давлатларнинг ваколатли органлари билан биргаликда виза муддатларини узайтириш масалалари ишлаб чиқилмоқда, юридик ва консуллик хизматлари кўрсатилмоқда, эҳтиёжманд фуқароларга вақтинча турар жой, озиқ-овқат, дори-дармон, шахсий гигиена воситалари ва бошқалар билан таъминлашда ёрдам кўрсатилмоқда.
Изоҳ (0)