Mercer konsalting guruhi tomonidan xorijlik mutaxassislar yashashi uchun eng qimmat shaharlar reytingi e’lon qilindi, ro‘yxatni uch yildan beri Gonkong boshqarmoqda.
Gonkong 2019-yildan beri davom etib kelayotgan norozilik namoyishlariga, AQSh dollari kursining tebranishlari va shaharda yashash narxlari ko‘tarilganiga qaramay yetakchilikni saqlab qoldi. Forbes’ning qayd etishicha, Gonkongning reytingda o‘z o‘rnida qolishiga ko‘chmas mulk narxlarining balandligi ham ta’sir qilgan.
Ikkinchi pog‘onani Turkmaniston poytaxti Ashxobod shahri egallagan. Bir yil ichida shahar beshta o‘ringa sakragan. Turkmanistonda giperinflyatsiya bilan bog‘liq iqtisodiy va ijtimoiy inqiroz kuzatilmoqda, deyiladi Mercer hisobotida. Ashxobodda import mahsulotlari va tovarlar narxining ko‘tarilishiga ham asosiy sabab ushbu omillar ekani qayd etilgan.
Top-10 reytingga Gonkong va Ashxoboddan tashqari Osiyodan Tokio (3-o‘rin), Singapur (5-o‘rin), Shanxay (7-o‘rin) va Pekin (10-o‘rin) shaharlari ham kiritilgan.
Yevropaning eng qimmat shaharlari Shveysariya davlati hududida joylashgan: Syurix 4-o‘rinni, Bern va Jeneva esa mos ravishda 8 va 9-o‘rinlarni band etdi. Shuningdek, AQShning Nyu-York shahri ham kuchli o‘nlikka kirib, 6-pog‘onani egallagan.
Xorijlik mutaxassislarning yashashi uchun eng arzon shaharlar sifatida Toshkent, Bishkek, Namibiyadagi Vindxuk shahri, shuningdek, Tunis e’tirof qilingan.
2020-yil mart oyida The Economist Intelligence Unit eng arzon va eng qimmat shaharlar reytingini e’lon qilgan va Toshkent ro‘yxatda 132-o‘rinda qayd etilib, eng arzon, ya’ni yashash uchun zarur narsalar narxi yuqori bo‘lmagan shaharlar o‘nligida qolgani xabar qilingan. Yanvar oyida dunyoning eng qimmat shaharlari reytingi e’lon qilingan va Toshkent unda 413-o‘rinni egallagandi. Toshkent 2019-yilning yozida Mercer kompaniyasi hisobotiga ko‘ra, ekspatlar uchun eng arzon shahar reytingidagi 1-o‘rinni Tunisga bo‘shatib bergan. 2019-yilning iyul oyida O‘zbekiston Numbeo portalining yashash uchun eng arzon mamlakatlar reytingida 6-o‘rinni egallagandi.
Izoh (0)