Dunyoda karantin cheklovlarini bekor qilayotgan mamlakatlar soni ortib bormoqda

Butun dunyoda COVID-19 koronavirus infeksiyasi tarqalishining oldini olish bo‘yicha mamlakatlar hukumatlari tomonidan joriy qilingan cheklov me’yorlari asta-sekin yumshatilib, odamlar normal hayotga qaytishni boshlamoqda. Bu haqda “Interfaks” xabar qilgan.

8-iyundan Irlandiyada barcha do‘konlarning ochilishiga ruxsat berildi, odamlar cheklov me’yorlari yumshatilganidan keyin o‘z ish joylariga qaytmoqda. Hozircha ofisda ijtimoiy masofalanish tartibiga rioya qila oladigan sharoitga ega fuqarolarning ko‘chaga chiqishi va ishga qatnashiga hech qanday to‘sqinlik yo‘q.

Irlandiyaliklarga bir-birlarining uyiga mehmonga borish, ya’ni olti kishigacha bo‘lgan guruhning to‘planishiga ruxsat berildi. O‘z uyidan 20 kilometr uzoqlikka ketish mumkin, zaruratga ko‘ra ushbu masofaga yana 5 kilometr qo‘shib berilishi ko‘zda tutilgan.

Gretsiyada ham bar va tungi klublar ham 8-iyundan boshlab o‘z faoliyatiga qaytdi. Biroq ularda tashrifchilarning soni cheklangan va ijtimoiy masofani saqlash qoidalariga amal qilish majburiy deb belgilangan.

Gretsiyada 25-maydan boshlab kafe hamda restoranlarning ochilishiga ruxsat berilgan, ammo tashrifchilar faqat tashqaridagi ayvonchalarda o‘tirib ovqatlanishi shart edi, endi binolar ichida ham mehmonlarni qabul qilish mumkin. Bundan tashqari, 1-iyundan mehmonxona, ochiq kinoteatr, golf klublar va suv havzalarining faoliyat yuritishi bo‘yicha taqiqlar ham bekor qilingan.

Belgiya poytaxti Bryussel shahrida uch oylik karantindan keyin kafe va barlar yana qayta ochiladi, shaharliklar ushbu yangilikni xursandchilik bilan qarshi olgan. Barlarda stollar orasidagi masofa kengaytirilgan. Bryussel markazi Gran-Plasdagi sayyohlar orasida ommaviylashgan maskanlar ayvonchalarini kengaytirib, tashrifchilar oqimini nazoratga olgan holda ijtimoiy masofa saqlash qoidalariga rioya qilinishini ta’minlamoqchi.

Biroq mamlakatdagi ayrim muassasalar hali tashrifchilar uchun eshiklarini ochgani yo‘q. Masalan, Berlemonda Yevropa Ittifoqi shtab-kvartirasi ro‘parasidagi jurnalistlar va diplomatlar tashrif buyuradigan bar 15-iyundan ochiladi. Iksel ma’muriy hududidagi Le Voltaire restorani ham hal ochilgani yo‘q.

Daniyada 8-iyundan boshlab 50 kishigacha bo‘lgan guruhning ko‘chada to‘planishiga ruxsat berildi. Bungacha ushbu cheklov me’yorida 10 kishigacha odamning bir yerda to‘planishi ko‘zda tutilgandi. Daniya 15-iyundan boshlab o‘z chegaralarini bir qator Yevropa davlatlari uchun ochishni ko‘zlamoqda.

Buyuk Britaniyada ham xorijdan keluvchilar uchun chegaralar ochilgan, ammo 8-iyundan boshlab qirollik hududiga xorijdan kelganlar majburiy tartibda 14 kunlik karantinga yuborilishi belgilab qo‘yilgan. Ular mamlakat hududiga kirgan vaqtida 14 kun davomida qayerda bo‘lishi yozib qo‘yiladigan maxsus hujjat shaklini to‘ldiradi. Ushbu tartibga amal qilmagan kishi jarima to‘laydi.

Avstriyada ham karantin cheklovlari yumshatilmoqda. Vena aeroportida xorijdan kelganlarga koronavirus testini majburiy tartibda topshirish taklif qilinadi, tahlil 190 yevro etib belgilangan va bu ularni 14 kunlik karantindan qutqarishi mumkin. Tekshiruv xulosalari tahlillar olinganidan keyin uch soat o‘tib ma’lum qilinadi. Venadan uchib ketish vaqtida ham xuddi shunday testni topshirish mumkin.Janubiy Afrika Respublikasida ta’lim jarayonining qaytishiga ruxsat berilgan, sababi mamlakatdagi ko‘plab maktablarda buning uchun kerakli sanitariya sharoitlarini yaratish imkoniyati mavjud.Lekin Lotin Amerikasidagi vaziyat, jumladan, Braziliyadagi ahvol o‘ta og‘ir holatda, mamlakatda 700 mingtadan ziyod kasallanish holati aniqlangan. 6—7-iyun kunlari mamlakatda koronavirus infeksiyasi haqidagi rasmiy ma’lumotlarni yangilash vaqtincha to‘xtatilishi va real raqamlarni chiqarish qiyinlashgani ma’lum qilingan.

Avval bir necha marta koronavirusning xavfli ekaniga ishonmasligini aytgan Braziliya prezidenti Jair Bolsonaru ushbu qarorni qo‘llab-quvvatlagan va buning uchun jamoatchilikning keskin tanqidiga uchragan. Davlat rahbariyatini ma’lumotlarni yashirganlikda ayblash boshlandi, poytaxt Braziliada Bolsonaruga, irqchilik va fashizmga qarshi norozilik namoyishlari boshlangan.

Bolsonaru ham Jahon sog‘liqni saqlash tashkiloti vakili mamlakatda koronavirusga qarshi e’lon qilingan cheklovlarning juda erta yumshatib yuborilganini tanqid qilgani uchun hukumatning davlatni JSST a’zoligidan chiqishi masalasini ko‘rib chiqishi mumkinligini bildirgan.

7-iyun kuni Braziliya sog‘liqni saqlash vazirligi koronavirusdan vafot etganlar soni haqidagi statistikani e’lon qildi. Idora avvaliga bir sutka ichida COVID-19 oqibatida kuzatilgan o‘limlar soni 1382 ta ekanini yozib, keyinroq ushbu raqamni 525 ga o‘zgartirib qo‘ygan va bu borada tushuntirish bermagan. Braziliyada koronavirus infeksiyasi oqibatida halok bo‘lganlar soni 36,4 mingdan 37,3 ming nafargacha bo‘lishi mumkin.

Hindistonda savdo markazlari, ibodatxonalar ochilmoqda, ammo bu yerda ham kasallanish holatlari aksincha ko‘payib ketmoqda. 8-iyun holatiga ko‘ra Hindistonda 9,9 mingta yangi kasallanish holatlari qayd etilib, koronavirus yuqtirib olganlarning umumiy soni 256 ming nafarga yetgan. Mamlakatda epidemiyaning o‘z cho‘qqisiga chiqishi iyul oyida sodir bo‘lishi mumkinligi taxmin qilinmoqda.

Pokistonda COVID-19 koronavirus infeksiyasiga chalinganlar soni 100 ming nafardan oshgan, kasalxonalar bemorlarga to‘lib ketdi, Karachida ayrim bemorlar shifoxona binosining yo‘laklarida yotibdi. Iyun boshidan beri bu yerda ham karantin cheklovlarini yumshatish tadbirlari boshlangan.

Eron Sog‘liqni saqlash vazirligi fuqarolardan doimiy ravishda tibbiy niqob taqib yurish va ushbu qoidaga amal qilishini so‘ragan. Ayniqsa, odamlar ko‘p to‘planadigan va ijtimoiy masofalanishga rioya etish qiyin bo‘lgan joylarda, xususan, katta do‘konlar, bozorlarda ushbu tartibni buzmaslik so‘ralgan.

Worldometers 8-iyun holati bo‘yicha bergan ma’lumotga ko‘ra pandemiya boshlanganidan beri koronavirus infeksiyasini yuqtirib olgan kishilarning umumiy soni 7,1 million nafardan oshgan, 406 mingdan ko‘proq bemor COVID-19 asoratlari tufayli vafot etgan. 3,4 milliondan ko‘proq odam esa ushbu kasallikdan tuzalgan.