Дунёда карантин чекловларини бекор қилаётган мамлакатлар сони ортиб бормоқда

Бутун дунёда COVID-19 коронавирус инфекцияси тарқалишининг олдини олиш бўйича мамлакатлар ҳукуматлари томонидан жорий қилинган чеклов меъёрлари аста-секин юмшатилиб, одамлар нормал ҳаётга қайтишни бошламоқда. Бу ҳақда «Интерфакс» хабар қилган.

8 июндан Ирландияда барча дўконларнинг очилишига рухсат берилди, одамлар чеклов меъёрлари юмшатилганидан кейин ўз иш жойларига қайтмоқда. Ҳозирча офисда ижтимоий масофаланиш тартибига риоя қила оладиган шароитга эга фуқароларнинг кўчага чиқиши ва ишга қатнашига ҳеч қандай тўсқинлик йўқ.

Ирландияликларга бир-бирларининг уйига меҳмонга бориш, яъни олти кишигача бўлган гуруҳнинг тўпланишига рухсат берилди. Ўз уйидан 20 километр узоқликка кетиш мумкин, заруратга кўра ушбу масофага яна 5 километр қўшиб берилиши кўзда тутилган.

Грецияда ҳам бар ва тунги клублар ҳам 8 июндан бошлаб ўз фаолиятига қайтди. Бироқ уларда ташрифчиларнинг сони чекланган ва ижтимоий масофани сақлаш қоидаларига амал қилиш мажбурий деб белгиланган.

Грецияда 25 майдан бошлаб кафе ҳамда ресторанларнинг очилишига рухсат берилган, аммо ташрифчилар фақат ташқаридаги айвончаларда ўтириб овқатланиши шарт эди, энди бинолар ичида ҳам меҳмонларни қабул қилиш мумкин. Бундан ташқари, 1 июндан меҳмонхона, очиқ кинотеатр, гольф клублар ва сув ҳавзаларининг фаолият юритиши бўйича тақиқлар ҳам бекор қилинган.

Бельгия пойтахти Брюссель шаҳрида уч ойлик карантиндан кейин кафе ва барлар яна қайта очилади, шаҳарликлар ушбу янгиликни хурсандчилик билан қарши олган. Барларда столлар орасидаги масофа кенгайтирилган. Брюссель маркази Гран-Пласдаги сайёҳлар орасида оммавийлашган масканлар айвончаларини кенгайтириб, ташрифчилар оқимини назоратга олган ҳолда ижтимоий масофа сақлаш қоидаларига риоя қилинишини таъминламоқчи.

Бироқ мамлакатдаги айрим муассасалар ҳали ташрифчилар учун эшикларини очгани йўқ. Масалан, Берлемонда Европа Иттифоқи штаб-квартираси рўпарасидаги журналистлар ва дипломатлар ташриф буюрадиган бар 15 июндан очилади. Иксель маъмурий ҳудудидаги Le Voltaire ресторани ҳам ҳал очилгани йўқ.

Данияда 8 июндан бошлаб 50 кишигача бўлган гуруҳнинг кўчада тўпланишига рухсат берилди. Бунгача ушбу чеклов меъёрида 10 кишигача одамнинг бир ерда тўпланиши кўзда тутилганди. Дания 15 июндан бошлаб ўз чегараларини бир қатор Европа давлатлари учун очишни кўзламоқда.

Буюк Британияда ҳам хориждан келувчилар учун чегаралар очилган, аммо 8 июндан бошлаб қироллик ҳудудига хориждан келганлар мажбурий тартибда 14 кунлик карантинга юборилиши белгилаб қўйилган. Улар мамлакат ҳудудига кирган вақтида 14 кун давомида қаерда бўлиши ёзиб қўйиладиган махсус ҳужжат шаклини тўлдиради. Ушбу тартибга амал қилмаган киши жарима тўлайди.

Австрияда ҳам карантин чекловлари юмшатилмоқда. Вена аэропортида хориждан келганларга коронавирус тестини мажбурий тартибда топшириш таклиф қилинади, таҳлил 190 евро этиб белгиланган ва бу уларни 14 кунлик карантиндан қутқариши мумкин. Текширув хулосалари таҳлиллар олинганидан кейин уч соат ўтиб маълум қилинади. Венадан учиб кетиш вақтида ҳам худди шундай тестни топшириш мумкин.Жанубий Африка Республикасида таълим жараёнининг қайтишига рухсат берилган, сабаби мамлакатдаги кўплаб мактабларда бунинг учун керакли санитария шароитларини яратиш имконияти мавжуд.Лекин Лотин Америкасидаги вазият, жумладан, Бразилиядаги аҳвол ўта оғир ҳолатда, мамлакатда 700 мингтадан зиёд касалланиш ҳолати аниқланган. 6—7 июнь кунлари мамлакатда коронавирус инфекцияси ҳақидаги расмий маълумотларни янгилаш вақтинча тўхтатилиши ва реал рақамларни чиқариш қийинлашгани маълум қилинган.

Аввал бир неча марта коронавируснинг хавфли эканига ишонмаслигини айтган Бразилия президенти Жаир Болсонару ушбу қарорни қўллаб-қувватлаган ва бунинг учун жамоатчиликнинг кескин танқидига учраган. Давлат раҳбариятини маълумотларни яширганликда айблаш бошланди, пойтахт Бразилиада Болсонаруга, ирқчилик ва фашизмга қарши норозилик намойишлари бошланган.

Болсонару ҳам Жаҳон соғлиқни сақлаш ташкилоти вакили мамлакатда коронавирусга қарши эълон қилинган чекловларнинг жуда эрта юмшатиб юборилганини танқид қилгани учун ҳукуматнинг давлатни ЖССТ аъзолигидан чиқиши масаласини кўриб чиқиши мумкинлигини билдирган.

7 июнь куни Бразилия соғлиқни сақлаш вазирлиги коронавирусдан вафот этганлар сони ҳақидаги статистикани эълон қилди. Идора аввалига бир сутка ичида COVID-19 оқибатида кузатилган ўлимлар сони 1382 та эканини ёзиб, кейинроқ ушбу рақамни 525 га ўзгартириб қўйган ва бу борада тушунтириш бермаган. Бразилияда коронавирус инфекцияси оқибатида ҳалок бўлганлар сони 36,4 мингдан 37,3 минг нафаргача бўлиши мумкин.

Ҳиндистонда савдо марказлари, ибодатхоналар очилмоқда, аммо бу ерда ҳам касалланиш ҳолатлари аксинча кўпайиб кетмоқда. 8 июнь ҳолатига кўра Ҳиндистонда 9,9 мингта янги касалланиш ҳолатлари қайд этилиб, коронавирус юқтириб олганларнинг умумий сони 256 минг нафарга етган. Мамлакатда эпидемиянинг ўз чўққисига чиқиши июль ойида содир бўлиши мумкинлиги тахмин қилинмоқда.

Покистонда COVID-19 коронавирус инфекциясига чалинганлар сони 100 минг нафардан ошган, касалхоналар беморларга тўлиб кетди, Карачида айрим беморлар шифохона биносининг йўлакларида ётибди. Июнь бошидан бери бу ерда ҳам карантин чекловларини юмшатиш тадбирлари бошланган.

Эрон Соғлиқни сақлаш вазирлиги фуқаролардан доимий равишда тиббий ниқоб тақиб юриш ва ушбу қоидага амал қилишини сўраган. Айниқса, одамлар кўп тўпланадиган ва ижтимоий масофаланишга риоя этиш қийин бўлган жойларда, хусусан, катта дўконлар, бозорларда ушбу тартибни бузмаслик сўралган.

Worldometers 8 июнь ҳолати бўйича берган маълумотга кўра пандемия бошланганидан бери коронавирус инфекциясини юқтириб олган кишиларнинг умумий сони 7,1 миллион нафардан ошган, 406 мингдан кўпроқ бемор COVID-19 асоратлари туфайли вафот этган. 3,4 миллиондан кўпроқ одам эса ушбу касалликдан тузалган.