Braziliya prezidenti Jair Bolsonaru hukumatning mamlakatda koronavirus epidemiyasiga oid rasmiy ma’lumotlarni qisman yashirish to‘g‘risidagi qarorini qo‘llab-quvvatladi, deb xabar beradi Reuters.
Foto: Reuters
5-iyun kuni Braziliya Sog‘liqni saqlash vazirligi koronavirus bilan kasallanganlar to‘g‘risida ma’lumot beruvchi sayt faoliyatini to‘xtatib qo‘ygandi.
Bolsonaru o‘zining Twitter’dagi sahifasiga vazirlik kasallik o‘choqlarini aniqlash va epidemiyaga qarshi kurashning kelgusi strategiyasini belgilab olish uchun COVID-19 bo‘yicha statistikalar to‘plamini optimallashtirayotganini yozib qoldirgan.
Uning ta’kidlashicha, hozirgi ma’lumotlar “mamlakatdagi vaziyatni aks ettirmaydi”. Statistikada xatolikka yo‘l qo‘ymaslik uchun, kasallar haqida ma’lumot mahalliy vaqt bilan soat 22:00 da e’lon qilinadi. Bunga qadar soat 17:00 dan 19:00 ga qadar joylashtirilardi.
Avvalroq Braziliya prezidenti Jair Bolsonaru AQSh kabi yo‘l tutib, Jahon sog‘liqni saqlash tashkilotidan chiqib ketishini ma’lum qilgandi.
Eslatib o‘tamiz, 19-may kuni Braziliya koronavirus bilan kasallanganlar soni bo‘yicha Britaniyadan o‘zib ketib, dunyoda 3-o‘ringa chiqib olgan bo‘lsa, 23-may kuni Rossiyadan o‘tib, 2-o‘ringa ko‘tarilgandi. Jons Hopkins universiteti ma’lumotlariga ko‘ra, mamlakatda koronavirus bilan kasallanganlar soni 672 846 kishiga yetgan, hozirga qadar qariyb 36 ming bemor COVID-19 qurboniga aylangan.
