Қашқадарё вилояти Чироқчи туманида коронавирус билан касалланиш бўйича янги ҳолатлар қайд этилгани сабабли туман транспорт воситалари учун ёпилди, бир қатор чекловлар қайта жорий қилинди. Бу ҳақда Чироқчи тумани ҳокимлиги томонидан маълум қилинди.
Маълум қилинишича, 9 июндан бошлаб Чироқчига кириш-чиқиш йўллари ёпилиб, туманда барча турдаги жамоат транспортлари ҳаракати вақтинчалик чекланди. Туман ва ИИБ бошлиғи жамоат транспорти ва йўналишсиз таксилар ҳаракати карантин даврида вақтинча тўхтатилиши хусусида ҳайдовчиларга тушунчалар берган.
Стационар постларда маҳаллий давлат ҳокимияти органлари, ҳуқуқ-тартибот идоралари, корхона, ташкилотларда ишловчи ходимларнинг автотранспорт воситалари мажбурий равишда дезинфекция қилинади.
Туманга кириш ва чиқишдаги чекловлар юк ташиш билан боғлиқ ҳолларга, доимий яшовчи (рўйхатдан ўтган) шахсларга, маҳаллий давлат ҳокимияти органларига, ҳуқуқ-тартибот идоралари, шифокор ва ҳамширалар, санитария-эпидемиологик осойишталик маркази ходимларига нисбатан татбиқ этилмайди.
Туман ҳокимлиги томонидан маълум қилинишича, Чироқчи тумани «қизил» тоифадаги ҳудудлар қаторига киритилгани сабабли туманда қатор карантин чекловлари қайта тикланди.
Чироқчида қуйидаги фаолият турларига чекловлар қайта кучга киради:
- туман ҳудудига кириб чиқиш назорат постларини жорий қилиш;
- автомашиналар ювиш шохобчалари фаолияти, автомобиллар ва техникаларига техник хизмат кўрсатувчи ташкилотлар;
- ҳунармандчилик, маиший жиҳозлар ва электрон қурилмаларни таъмирлаш устахоналари;
- парк ва истироҳат боғлари;
- ноозиқ-овқат маҳсулотлари чакана савдоси, заргарлик ва гул сотиш дўконлари;
- йўналишсиз таксида йўловчи ташиш;
- жамоат транспорти ҳаракати;
- барча турдаги оммавий тадбирлар (концерт, театр, кинотеатр, музей, спорт тадбирлари), оилавий тантана, маърака ва маросимлари (дафн маросимлари, 10-15 кишидан кўп бўлмаган ҳоллар бундан мустасно);
- буюм бозорлари;
- савдо мажмуалари;
- сартарошхона ва гўзаллик салонлари;
- пойабзал таъмирлаш нуқталари ва устахоналари;
- спорт заллари ва фитнес клублар;
- тунги клуб ва дискотекалар;
- караоке ва бильярд заллари, чилим (кальян) марказлари, компьютер ўйинлари фаолияти;
- умумий овқатланиш корхоналари (етказиб бериш учун тайёрлаш бундан мустасно);
- яхна ичимлик савдо нуқталари (улгуржи тарқатиш нуқталари бундан мустасно);
- таълим ташкилотлари (боғча, мактаб, коллеж ва бошқалар) ўқув курслари;
- меҳмонхоналар, шунингдек, меҳмон уйлари;
- давлат органлари ва ташкилотларида жисмоний шахслар ва юридик шахслар қабули;
- тумандаги барча жоме масжидлар.
Эслатиб ўтамиз, 1 майдан буён коронавирусдан холи ҳудуд бўлган Қашқадарёга 5 июнь куни коронавирус қайтди. Тошкент шаҳридаги «Ўрикзор» бозорида юк ташувчи бўлиб ишлаган чироқчилик фуқаро ва у билан яқин мулоқотда бўлган 3 нафар оила аъзосида коронавирус аниқланган. 2020 йил 6 июнь ҳолати бўйича, Чироқчи тумани «қизил» ҳудуд бўлиб турибди.
Изоҳ (0)