“Sariq” hududlarda sun’iy futbol maydonlari faoliyati tiklandimi? Nurmat Otabekov javob berdi

O‘zbekistonning “sariq” rangli hududlaridagi sun’iy futbol maydonlarida sport bilan shug‘ullanish mumkinligi ma’lum qilindi.

Bu haqda Vazirlar Mahkamasi huzuridagi Sanitariya-epidemiologiya nazorati davlat inspeksiyasi boshlig‘i Nurmat Otabekov 8-iyun kungi brifingda ma’lum qildi.

“Agar mazkur futbol maydonlari, umuman sport maydonlarida karantin tadbirlariga rioya qilinsa, sport bilan shug‘ullanish mumkin va bunga to‘sqinlik qiladigan jihat yo‘q”, — deydi Otabekov.

Avvalroq Respublikaning “yashil” va “sariq” hududlarida 1-iyundan boshlab sport seksiyalari, to‘garaklari, sport zallari va fitnes klublar faoliyatiga ruxsat berilishi haqida ma’lum qilingandi.

13-iyundan boshlab esa futbol bo‘yicha O‘zbekiston Superligasining joriy mavsumiga restart beriladi.