Toshkent shahrida birgina 7-iyunning o‘zida soat 18:00 ga qadar 185 kishida koronavirus infeksiyasi tasdiqlandi. Sog‘liqni saqlash vazirligi ma’lumotlari shundan dalolat bermoqda.

SSVning 7-iyun kuni soat 10:00 dagi axborotida O‘zbekistonda 87 kishida koronavirus tasdiqlangani, ularning bari Toshkent shahrida koronavirusga chalinganlar bilan muloqotda bo‘lgan fuqarolar ekani ma’lum qilingan edi.

Vazirlikning soat 18:00 dagi axborotida mamlakat bo‘yicha yana 121 kishida kasallik tasdiqlangani, ularning 98 nafari Toshkentdan ekani ko‘rsatilgan — ularning bari koronavirusga chalinganlar bilan muloqotda bo‘lganlar.

Sog‘liqni saqlash vazirligi bu 185 kishi kasallikni aynan kimlardan yuqtirgani (kasallik yuqishining zanjir ketma-ketligi) haqida axborot berganicha yo‘q.

Qayd etish joiz, so‘nggi bir necha kundan beri poytaxtda aholi orasida muntazam ravishda koronavirusga chalinganlar aniqlanayotgan edi — 6-iyun kuni 10 kishida, 5-iyun kuni 9 kishida, 4-iyun kuni 4 kishida kasallik qayd etilgan edi.

Sog‘liqni saqlash vazirligi ma’lumotlariga ko‘ra, 6-iyun kuni Qoratoshdagi Mediapark’ning ikki xodimida, 5-iyun kuni esa Olmazor tumanidagi nafaqadagi fuqaroda, “O‘rikzor”dagi yana bir sotuvchi va uning besh nafar oila a’zosida, 4-iyun kuni esa Shayxontohur tumanida vaqtincha yashovchi fuqaro, shu tumandagi qurilish firmasi xodimi, Mirobod tumanidagi pensioner, Yunusobod tumanida yashovchi fuqaro koronavirus infeksiyasini yuqtirib olgani ma’lum bo‘lgan edi.

Bir kunda 185 kishida kasallik aniqlanishi — bu nafaqat Toshkent shahri uchun, balki butun O‘zbekiston uchun ham rekord ko‘rsatkichdir (ma’lumot uchun, hali yakuniga yetmagan 7-iyun davomida O‘zbekiston bo‘yicha 208 kishida kasallik aniqlandi).

Shu vaqtgacha O‘zbekistonda kasallanish holatlari bo‘yicha kunlik eng yuqori ko‘rsatkich 14-aprel kuni qayd etilgan, o‘shanda 167 kishida kasallik tasdiqlangan edi. Kasallanganlar soni so‘nggi bor 26-may kuni 100 kishidan oshgan edi — o‘shanda butun kun davomida 101 kishida koronavirus aniqlangan.