O‘zbekistonda karantin tartibi kuchaytirilgan mart oyining oxiri, aprel oyi boshlarida 1 million tonnaga yaqin sement omborxonalarda turib qolgan. Bu haqda Prezident Shavkat Mirziyoyevning Farg‘ona viloyatiga tashrifi doirasida jurnalistlar bilan uchrashgan “O‘zsanoatqurilishmateriallari” uyushmasi boshqaruvi raisi Botir Zaripov ma’lum qildi, deya xabar bermoqda “Daryo” muxbiri Mirolim Isajonov.
Zaripov karantin tadbirlarining qurilish materiallari, xususan, sement mahsulotini ishlab chiqarish va uning savdosiga qanchalik ta’sir qilgani haqida to‘xtalarkan, agar qish oylarida bir qator sement zavodlarida gaz ta’minoti bilan bog‘liq muammolar bo‘lmaganida, omborlada to‘planib, sotilmay qolgan sement miqdori 2-3 million tonnani tashkil etishi mumkin bo‘lganini ta’kidladi.
Karantin tartibi yumshatilib, qurilish ishlarini qaytadan boshlashga ruxsat berilgach, omborlarda qolib ketgan 1 million tonna sement qisqa vaqt ichida sotilib ketgan. “Hozirgi paytda sement zavodlarimizda 15 ming nafar ishchi karantin qoidalariga qat’iy amal qilgan holda ishlab kelmoqda”, — dedi “O‘zsanoatqurilishmateriallari” uyushmasi rahbari.
O‘zbekistonning bir yillik sement ishlab chiqarish quvvati 2020-yil 1-yanvar holatiga ko‘ra, 15 million tonnani tashkil etadi. Botir Zaripovning ta’kidlashicha, 2020-yilning sentabr—oktabr oylarida ishlab chiqarish quvvati 3 million tonna bo‘lgan “Ohangaronsement” ishga tushadi, shuningdek, umumiy quvvati 3 million tonna atrofida bo‘lgan bir necha kichik zavodlar ish boshlashi kutilmoqda. Shu tariqa 2020-yil oxiriga borib mamlakatda sement ishlab chiqarish quvvati 20 million tonnadan oshishi kutilmoqda.
Eslatib o‘tamiz, Prezident Shavkat Mirziyoyev Farg‘ona viloyatiga tashrifi doirasida 5-iyun kuni Farg‘ona tumanidagi “Ekokerama” kompaniyasida bo‘lgan edi. Ushbu kompaniya yiliga 500 ming dona 20 turdagi santexnika mahsulotlari ishlab chiqarish quvvatiga ega, ya’ni Prezident matbuot xizmatining qayd etishicha, “importning aksariyat qismi o‘rnini to‘ldiradi”. Shavkat Mirziyoyev korxonaga mahsulotlarini sotishda ko‘maklashish bo‘yicha mutasaddilarga ko‘rsatmalar bergan.
Izoh (0)