Farg‘onadagi suv omboridan yirik baliqlar oqib chiqqani ma’lum bo‘ldi. Viloyatda baliqchilarga qarshi reyd o‘tkazilmoqda

Ijtimoiy tarmoqlarda Farg‘ona viloyati Yozyovon tumanida aholi kanallarda oqib kelayotgan yirik baliqlarni ovlayotgani haqida videolar tarqaldi. Ma’lum bo‘lishicha, 26-may kuni Yozyovon tumanida qurilayotgan “Markaziy Farg‘ona” suv omborida baliqchilik bilan shug‘ullanuvchi tadbirkorning baliq saqlash ko‘lida, suvning tashqariga chiqish qismidagi himoya to‘ri texnogen omillar ta’sirida ochilib ketgan. Bu haqda Ekologiya va atrof-muhitni muhofaza qilish davlat qo‘mitasi xabar berdi.

Ta’kidlanishicha, sim to‘rlar eskirgani sababli uzilib, baliqlarning bir qismi “Markaziy Farg‘ona” suv ombori atrofidagi soy va kanallarga oqib chiqqan.

“Holat bo‘yicha viloyat Ekologiya va atrof-muhitni muhofaza qilish boshqarmasining ekoinspeksiyasi va Yozyovon tuman inspektorlari tomonidan tezkor reydlar tashkil qilinib, tun-u kun nazorat qilinmoqda.

27—28-may kunlari Yozyovon suv omboridan chiqqan baliqlarni fuqarolar tomonidan noqonuniy ravishda ov qilayotgan 9 nafar huquqbuzarga nisbatan 12 million 320 ming so‘m miqdorida jarima va 10 million 813 ming so‘m hayvonot dunyosiga yetkazilgan zarar hisoblangan”, – deyiladi qo‘mita axborotida.

Bundan tashqari, 300 metrdan ortiq to‘rlar olinib, belgilangan tartibda yo‘q qilingan. Reyd tadbirlari davom etmoqda.

Ma’lumot uchun, Qoraqalpog‘iston Respublikasi va Xorazm viloyatlaridan tashqari O‘zbekistonning barcha hududlarida 15-apreldan 1-iyunga qadar tabiatda baliq ovlash taqiqlangan (yuqoridagi ikki hududda esa bu muddat 25-apreldan 10-iyungacha). Bu oraliq muddat – baliqlarning ko‘payadigan davri.

“Kun.uz”ning Farg‘ona viloyati Favqulodda vaziyatlar boshqarmasiga tayanib, ma’lum qilishicha, 26-may kuni “Markaziy Farg‘ona” suv omborining texnik holati o‘rganilgan. Farg‘ona viloyati hokimligi idoralararo komissiyasi ishchi guruhi – viloyat FVB, MGQB, “Sanoatgeokontexnazorat” tashkiloti, “O‘zdavsuvxo‘jalik” inspeksiyasi mas’ul xodimlari tomonidan o‘tkazilgan taftishda suv omborining texnik holati me’yorida ekani tasdiqlangan.

“Aholi tomondan ovlangan baliqlar suv omborining suv tarqatish kanalidan chiqib ketgan. Fermer xo‘jaliklari tomonidan boqilayotgan baliqlar sadoklar orasidan suv oqimi bo‘ylab chiqib ketgan bo‘lishi mumkin. Suv omborda loyiha bo‘yicha qurilish ishlari davom etmoqda”, – deyiladi viloyat Favqulodda vaziyatlar boshqarmasi axborot xizmati ma’lumotida.