AQSh Ukrainada biologik qurol yaratilishining oldini olishga mo‘ljallangan o‘ta xavfli infeksiyalar saqlanuvchi sakkizta laboratoriya qurgan. Bu haqda mamlakat Sog‘liqni saqlash vazirligiga tayanib, Ukranews xabar berdi.
Ma’lumotlarga ko‘ra, Pentagonga qarashli Xavfni kamaytirish agentligi Ukrainadagi laboratoriyalarni qurish yoki modernizatsiya qilish orqali ularga texnik yordam ko‘rsatgan. Ushbu yordam Amerikaning Black & Veatch Special Projects Corporation’s (BVSPC) kompaniyasi tomonidan bevosita taqdim etilgan.
“Shartnoma shartlariga ko‘ra, Ukrainaga yordam Lvovdagi Epidemiologiya va gigiyena ilmiy-tadqiqot instituti, Odessadagi Vaboga qarshi Ukraina ilmiy-tadqiqot instituti va Sog‘liqni saqlash vazirligi muassasalari, shuningdek, biologik qurolni yaratishda foydalanish mumkin bo‘lgan boshqa obyektlardagi texnologiyalar, patogen va ma’lumotlar tarqalishining oldini olish maqsadida ko‘rsatilgan”, — deyiladi xabarda.
2014-yilga qadar Ukrainada viloyat laboratoriya markazlari bazasida sakkiz laboratoriya qurilgan, modernizatsiya qilinib, foydalanishga topshirilgan. Dastur 2016-yili Ukrainaning Yevropa Ittifoqiga integratsiya masalalari bo‘yicha vazirligi hamda BVSPC o‘rtasida imzolangan memorandumga ko‘ra qayta tiklangan. Uch yil davomida 1,28 million dollarni o‘zlashtirish va laboratoriyalarni kasalliklarni elektron kuzatish tizimlariga ulash rejalashtirilgan.
Loyihaning ro‘yxatga olish kartasi 2017-yilda iqtisodiyot vazirining o‘sha paytdagi birinchi o‘rinbosari Maksim Nefodov tomonidan tasdiqlangan. Unda 13 ta obyekt sanab o‘tilgan.
Izoh (0)