АҚШ Украинада биологик қурол яратилишининг олдини олишга мўлжалланган ўта хавфли инфекциялар сақланувчи саккизта лаборатория қурган. Бу ҳақда мамлакат Соғлиқни сақлаш вазирлигига таяниб, Ukranews хабар берди.
Маълумотларга кўра, Пентагонга қарашли Хавфни камайтириш агентлиги Украинадаги лабораторияларни қуриш ёки модернизация қилиш орқали уларга техник ёрдам кўрсатган. Ушбу ёрдам Американинг Black & Veatch Special Projects Corporation’s (BVSPC) компанияси томонидан бевосита тақдим этилган.
«Шартнома шартларига кўра, Украинага ёрдам Львовдаги Эпидемиология ва гигиена илмий-тадқиқот институти, Одессадаги Вабога қарши Украина илмий-тадқиқот институти ва Соғлиқни сақлаш вазирлиги муассасалари, шунингдек, биологик қуролни яратишда фойдаланиш мумкин бўлган бошқа объектлардаги технологиялар, патоген ва маълумотлар тарқалишининг олдини олиш мақсадида кўрсатилган», — дейилади хабарда.
2014 йилга қадар Украинада вилоят лаборатория марказлари базасида саккиз лаборатория қурилган, модернизация қилиниб, фойдаланишга топширилган. Дастур 2016 йили Украинанинг Европа Иттифоқига интеграция масалалари бўйича вазирлиги ҳамда BVSPC ўртасида имзоланган меморандумга кўра қайта тикланган. Уч йил давомида 1,28 миллион долларни ўзлаштириш ва лабораторияларни касалликларни электрон кузатиш тизимларига улаш режалаштирилган.
Лойиҳанинг рўйхатга олиш картаси 2017 йилда иқтисодиёт вазирининг ўша пайтдаги биринчи ўринбосари Максим Нефодов томонидан тасдиқланган. Унда 13 та объект санаб ўтилган.
Изоҳ (0)