Surxondaryo viloyatining Uzun tumanida traktor ishtirokidagi yo‘l-transport hodisasi oqibatida haydovchi vafot etdi. Bu haqda YHXBB xabar bermoqda.
Hodisa 22-may kuni soat 19:20 larda “Chinor” mahallasi hududidagi adirlikda, transport vositalari harakatlanishi uchun mo‘ljallanmagan joyda yuz bergan. 1971-yilda tug‘ilgan E.X. (erkak) “TTZ-28” rusumli tirkamali traktorni pastlik tomon boshqarib ketayotib, rul boshqaruvini yo‘qotib, jarlikka ag‘darilgan.
Oqibatda haydovchi E.X. og‘ir tan jarohatlari olib shifoxonada vafot etgan.
Mazkur hodisa yuzasidan Uzun tumani IIO FMB TB tomonidan surishtiruv ishlari olib borilmoqda.
May oyida traktorlar ishtirokidagi odam o‘limi bilan yakunlangan boshqa yo‘l-transport hodisalari ham sodir bo‘lgandi. Jumladan, 3-may kuni Surxondaryoning Qumqo‘rg‘on tumanida Captiva bilan to‘qnashishi oqibatida traktor yo‘lovchisi bo‘lgan 13 yoshli bola, 12-may kuni Buxoroning Romitan tumanida traktor tirkamasi ag‘darilib ketishi oqibatida 33, 34 va 38 yoshli ayollar, 17-may kuni Farg‘onaning Qo‘shtepa tumanida traktor tirkamasi bosib olishi oqibatida 3 yoshli bola vafot etgandi.
Izoh (0)