Surxondaryo viloyati Qumqo‘rg‘on tumanida 3-may, yakshanba kuni soat 16:30 da Captiva va “T-28” rusumli traktor ishtirokida yo‘l-transport hodisasi sodir bo‘ldi. Bu haqda Tergov departamenti xabar bermoqda.

Foto: Tergov departamenti

Hodisa Qumqo‘rg‘on tumani “Arslonboyli” mahallasi hududidan o‘tuvchi 4K-596 avtomobil yo‘lining 4-kilometrida yuz bergan. 73 yoshli B.Sh. Captiva avtomobili bilan harakatlanib kelayotganida boshqaruvni yo‘qotib, qarama-qarshi tomondan kelayotgan 34 yoshli fuqaro A.J. boshqaruvidagi “T-28” rusumli traktor yo‘liga chiqib ketib, yo‘l-transport hodisasini sodir etgan.

Foto: Tergov departamenti

Tergov qo‘mitasi tomonidan taqdim etilgan suratlarda traktorning kabinasi ikkiga bo‘linib ketgani, tirkamasi ham kabinasidan ajralib ketganini ko‘rish mumkin.

Foto: Tergov departamenti

Hodisa oqibatida traktor yo‘lovchisi, 7-sinf o‘quvchisi Sh.J. tan jarohatlari bilan shifoxonaga yotqizilgan. 13 yoshli Sh.J. ko‘rsatilgan tibbiy muolajalarga qaramasdan 7-may kuni shifoxonada vafot etgan.

Foto: Tergov departamenti

Mazkur holat yuzasidan Surxondaryo viloyati Qumqo‘rg‘on tumani IIB huzuridagi Tergov bo‘limi tomonidan Jinoyat kodeksining 266-moddasi 2-qismi (Odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Ushbu modda bilan aybdor deb topilgan shaxs 7 yilgacha ozodlikdan mahrum etilishi mumkin.

Qumqo‘rg‘ondagi hodisa yuz bergan haftada YHXBB va Tergov departamenti odam o‘limi bilan yakunlangan 7 ta YTH haqida axborot bergandi. Ulardan 5 tasi Surxondaryo hududida sodir bo‘lgan edi. Endilikda odam o‘limi bilan yakunlangan YTHlar soni ham, Surxondaryodagi hodisalar ham bittaga oshdi.