Sardobadagi falokat oqibatida jami 34 ta ijtimoiy soha obyektlari talafot ko‘rgani ma’lum qilindi

Sardoba, Oqoltin va Mirzaobod tumanlaridagi jami 34 ta ijtimoiy soha obyektlari qisman va to‘liq darajada talafot ko‘rgani ma’lum qilindi.

“Yuksalish” umummilliy harakati Sardoba suv omborida yuzaga kelgan toshqin oqibatlari va ularni bartaraf etish bo‘yicha amalga oshirilayotgan ishlar tasvirlangan infografika bilan bo‘lishdi. Unda tasvirlanishicha, jami 34 ta ijtimoiy soha obyektlari qisman va to‘liq darajada, shuningdek, 6 ta profilaktika inspektorining xizmat uylariga talafot yetgan.

Ta’kidlanishicha, barcha ijtimoiy soha muassasalarida yetkazilgan talafot miqdori o‘rganilmoqda. Jumladan:

• maktabgacha ta’lim tashkilotlari — 9 ta muassasa barchasini mukammal ta’mirlash, bundan tashqari 1 ta yangi MTT qurish rejalashtirildi;
• umumta’lim maktablari — 14 ta maktabni mukammal ta’mirlash, 2 ta maktabni rekonstruksiya qilish hamda 1 ta yangi maktab qurish;
• 1 ta kasb-hunar kollej binosini mukammal ta’mirlash;
• sog‘liq saqlash muassasalarining 4 tasini mukammal ta’mirlash, 3 tasini rekonstruksiya qilish va 1 tasini yangi qurish bo‘yicha takliflar ishlab chiqildi.