G‘arbda aholining Osiyo qit’asidagi davlatlarda yashovchi odamlarga qaraganda hukumatlar tomonidan koronavirus pandemiyasiga qarshi kurash chora-tadbirlaridan norozi bo‘lish holatlari kuzatilmoqda. Toluna xalqaro tadqiqotlar kompaniyasi va Singapurning Blackbox Research kompaniyasi reytingida shunday xulosaga kelingan.
Ular odamlarning hukumat, biznes hamda jamoatchilikning pandemiya ta’siriga qanday munosabat bildirayotganini baholagan. Davlatning pandemiyaga qarshi ko‘rgan chora-tadbirlarini aholi tomonidan yuqori baholash bo‘yicha Xitoy (100 dan 85 ball), Vyetnam (77), BAA (59), Hindiston (59) va Malayziya (58) yetakchilik qilmoqda.
Tadqiqot mualliflari 3—19-aprelgacha bo‘lgan muddatda 23 mamlakatda 12,5 ming nafar odam o‘rtasida ijtimoiy so‘rov o‘tkazgan. Unda ishtirok etganlar pandemiyaga qarshi 4 asosiy qatlam harakatlariga baho bergan: hukumat, biznes, jamoatchilik va OAV.
Mualliflar mamlakatlar reytingini 100 ballik mezon asosida shakllantirgan, bunda ijtimoiy so‘rovnomada ishtirok etgan aholi qatlamining hukumat va boshqa institutlar tomonidan vaziyatga qanday baho berilgani foizlarda aks etgan.
G‘arb davlatlarida fuqarolar o‘z mamlakatlarining koronavirus tarqalishiga munosabatini ancha past baholagan: Fransiya 26 ball, Italiya — 36, Buyuk Britaniya — 37, AQSh va Germaniya — 41. Eng past ko‘rsatkich Yaponiyada qayd etilgan — 16 ball, dunyo bo‘yicha o‘rtacha olingan baho esa 45 ballni tashkil qilgan. So‘rovda o‘zbekistonlik fuqarolar ishtirok etmagan.
Hukumat va davlat rahbarining pandemiyaga qarshi ko‘rgan choralariga berilgan bahoda Xitoy yaqqol peshqadam (ishtirokchilarning 86 foizi pandemiyaga bildirilgan reaksiyani ijobiy deb hisoblagan), keyingi o‘rinda Vyetnam (82 foiz) va Yangi Zelandiya (67 foiz) joylashgan.
Butun dunyoda bu boradagi o‘rtacha ko‘rsatkich 40 foizga teng, Yaponiyada — 5 foiz, Fransiyada — 14 foiz, Janubiy Koreyada — 21 foiz, Italiyada — 25 foiz, Buyuk Britaniyada — 30 foiz, AQShda — 32 foiz va Germaniyada — 35 foiz.
“Ushbu mamlakatlarning aksar qismida mazkur pandemiyadan xavotir nisbatan kam. Hukumat inqirozga qarshi kurashishga urinmoqda va buning oqibatida aholida davlat boshqaruvidagilarga nisbatan ishonchsizlik holati kelib chiqmoqda”,— deydi Blackbox Research asoschisi va rahbari Devid Blek.
Uning so‘zlariga ko‘ra, Osiyo mamlakatlari avval SARS va MERS kabi koronavirus infeksiyalariga qarshi kurash amaliyotiga ega bo‘lgani uchun ham aholining norozilik ko‘rsatkichi nisbatan kamroq.
Mavzuga doir:
Izoh (0)