Хитой аҳолиси АҚШ ва Германия фуқароларидан кўра кўпроқ ўз ҳукуматларининг COVID-19’га қарши кўрган чораларини олқишламоқда

Ғарбда аҳолининг Осиё қитъасидаги давлатларда яшовчи одамларга қараганда ҳукуматлар томонидан коронавирус пандемиясига қарши кураш чора-тадбирларидан норози бўлиш ҳолатлари кузатилмоқда. Toluna халқаро тадқиқотлар компанияси ва Сингапурнинг Blackbox Research компанияси рейтингида шундай хулосага келинган.

Улар одамларнинг ҳукумат, бизнес ҳамда жамоатчиликнинг пандемия таъсирига қандай муносабат билдираётганини баҳолаган. Давлатнинг пандемияга қарши кўрган чора-тадбирларини аҳоли томонидан юқори баҳолаш бўйича Хитой (100 дан 85 балл), Вьетнам (77), БАА (59), Ҳиндистон (59) ва Малайзия (58) етакчилик қилмоқда.

Тадқиқот муаллифлари 3—19 апрелгача бўлган муддатда 23 мамлакатда 12,5 минг нафар одам ўртасида ижтимоий сўров ўтказган. Унда иштирок этганлар пандемияга қарши 4 асосий қатлам ҳаракатларига баҳо берган: ҳукумат, бизнес, жамоатчилик ва ОАВ.

Муаллифлар мамлакатлар рейтингини 100 баллик мезон асосида шакллантирган, бунда ижтимоий сўровномада иштирок этган аҳоли қатламининг ҳукумат ва бошқа институтлар томонидан вазиятга қандай баҳо берилгани фоизларда акс этган.

Ғарб давлатларида фуқаролар ўз мамлакатларининг коронавирус тарқалишига муносабатини анча паст баҳолаган: Франция 26 балл, Италия — 36, Буюк Британия — 37, АҚШ ва Германия — 41. Энг паст кўрсаткич Японияда қайд этилган — 16 балл, дунё бўйича ўртача олинган баҳо эса 45 баллни ташкил қилган. Сўровда ўзбекистонлик фуқаролар иштирок этмаган.

Ҳукумат ва давлат раҳбарининг пандемияга қарши кўрган чораларига берилган баҳода Хитой яққол пешқадам (иштирокчиларнинг 86 фоизи пандемияга билдирилган реакцияни ижобий деб ҳисоблаган), кейинги ўринда Вьетнам (82 фоиз) ва Янги Зеландия (67 фоиз) жойлашган.

Бутун дунёда бу борадаги ўртача кўрсаткич 40 фоизга тенг, Японияда — 5 фоиз, Францияда — 14 фоиз, Жанубий Кореяда — 21 фоиз, Италияда — 25 фоиз, Буюк Британияда — 30 фоиз, АҚШда — 32 фоиз ва Германияда — 35 фоиз.

«Ушбу мамлакатларнинг аксар қисмида мазкур пандемиядан хавотир нисбатан кам. Ҳукумат инқирозга қарши курашишга уринмоқда ва бунинг оқибатида аҳолида давлат бошқарувидагиларга нисбатан ишончсизлик ҳолати келиб чиқмоқда»,— дейди Blackbox Research асосчиси ва раҳбари Дэвид Блэк.

Унинг сўзларига кўра, Осиё мамлакатлари аввал SARS ва MERS каби коронавирус инфекцияларига қарши кураш амалиётига эга бўлгани учун ҳам аҳолининг норозилик кўрсаткичи нисбатан камроқ.