Koson tumani hokimi Asrol Boyqarayev karantin paytida uyi buzilayotgani aytilgan gulbog‘liklar bilan uchrashib, hozirda ularni hech kim bezovta qilmasligini bildirgan va aholini xotirjam qilgan. Bu haqda “Daryo”ga tuman hokimligi axborot xizmati ma’lum qildi.
“Daryo”da e’lon qilingan maqolada Gulbog‘ qishlog‘i hududidagi noturar joyda yashayotgan aholi muammosi tilga olinib, karantinda bezovta bo‘layotgani yozilgandi.
“Avvalo shuni ta’kidlash kerakki, 1987—1988-yillar davomida Dehqonobod tumanining Boyqo‘rg‘on, G‘injak qishloqlarida yashovchi 50-60 ta xonadon vakillari ushbu hududga ko‘chirib kelingan va uy-joy qilib berilgan. Ana shunday xonadonlarning beshtasi qarovsiz turgan ikki qavatli binoni o‘ziga uy-joy sifatida moslashtirib olgan. Aslida mazkur maishiy xizmat uyi 1985-yil qurib bitkazilgan bo‘lib, egalik huquqi 2011-yil ‘Siroj o‘g‘li Behzod’ fermer xo‘jaligiga, 2018-yil fermer xo‘jaligi rahbari va tadbirkor Renat Yusupov kelishuviga ko‘ra tadbirkor ixtiyoriga o‘tgan. Bundan ko‘rinadiki, aholi bu joyni o‘zboshimchalik bilan egallab olgan”, — deyiladi hokimlik munosabatida.
Aytilishicha, gulbog‘liklar shu kunga qadar hokimlik tomonidan berilayotgan barcha takliflarni rad etgan.
“Maishiy xizmat uyini o‘zboshimchalik bilan egallab olgan fuqarolar muammosiga yagona yechim, uy qurish uchun boshqa hududdan yer ajratishdir, — deyiladi tuman hokimligi munosabatida. — Hokimlik tomonidan ajratilgan yerning barcha hujjatlari tayyorlab beriladi. Aholidan faqat uyini qurib olish talab etiladi. Uy qurilishi uchun homiylar tomonidan qurilish materiallari ham yetkazib berilishi aytilgan. Mahalla raisi, hokimlik mas’ullari va tuman hokimi o‘rinbosari Sobir Eshov bu borada aholiga bir necha marta taklif bergan. Vaziyatni tushuntirgan. Ammo mehnatga layoqati bor xonadon egalari bu taklifni rad etgan”.
Bugun, 6-may kuni, gulbog‘liklar bilan uchrashgan hokim aholiga kam ta’minlanganlar uchun qurilayotgan arzon uy-joylardan olishni taklif qilib, uylarning boshlang‘ich to‘lovini to‘lashda yordam qilishini aytgan.
Qayd etilishicha, Kosonda 2020-yilda 96 ta arzonlashtirilgan ko‘p qavatli uy-joylar quriladi. Bu uy-joylar kam ta’minlangan, boquvchisini yo‘qotgan uysiz fuqarolarga arzon narxda beriladi.
Izoh (0)