Axborot va ommaviy kommunikatsiyalar agentligi tomonidan “Davlat boshqaruvi organlari va mahalliy davlat hokimiyati organlari muassisligidagi davriy bosma nashrlarni qo‘llab-quvvatlash va ular faoliyatini yanada rivojlantirishga oid qo‘shimcha chora-tadbirlar to‘g‘risida”gi Vazirlar Mahkamasi qarori loyihasi tayyorlandi va jamoatchilik muhokamasiga qo‘yildi.
Agentlik xabarida aytilishicha, loyihadan davlat boshqaruvi organlari va mahalliy davlat hokimiyati organlarining gazeta va jurnallari xodimlari maoshlarini mahalliy hokimiyat organlarining budjetdan tashqari jamg‘armalari hisobidan qoplash, sof foydani tahririyat hisobida qoldirish, davriy bosma nashrlarning xodimlari malakasini oshirish, xususan, gazeta va jurnallar elektron nashrini yuritishda zarur bo‘lgan ko‘nikmalarni shakllantirish bo‘yicha o‘quv kurslarini tashkil etish kabi bir qator muhim vazifalar o‘rin olgan.
Jumladan, ommaviy axborot vositalari, shu jumladan, davlat hokimiyati va boshqaruv organlari muassisligidagi davriy bosma nashrlar 2020-yil 1-iyuldan boshlab davlat boji undirilmasdan ommaviy axborot vositasi sifatida davlat ro‘yxatidan va qayta ro‘yxatdan o‘tkaziladi.
O‘z muassisliklaridagi davriy bosma nashrlarni har tomonlama qo‘llab-quvvatlash, ular faoliyatini rivojlantirish, shu jumladan, jurnalist-kadrlar zaxirasini shakllantirish, moddiy-texnik bazasini mustahkamlash bo‘yicha 2021—2022-yillarga mo‘ljallangan “Yo‘l xaritalari”ni ishlab chiqishlari lozim bo‘ladi.
“Yo‘l xaritalari”ni ishlab chiqishda quyidagilar ustuvor yo‘nalishlar sifatida belgilanadi:
- 2020-yil 1-sentabrga qadar o‘z muassisligidagi davriy bosma nashrlarning elektron variantlarini ishlab chiqish va ishga tushirish;
- ehtiyojmand va faol jurnalistlarning moliyaviy ahvolini yaxshilash bilan bog‘liq tadbirlarni amalga oshirish;
- tahririyat xodimlarining ijtimoiy muhofazasini kuchaytirish, ularni moddiy va ma’naviy qo‘llab-quvvatlash, shu jumladan, davlat mukofotlariga tavsiya etish orqali rag‘batlantirib borish;
- Respublika ma’naviyat va ma’rifat markazi, uning hududiy bo‘limlari bilan birgalikda oyda bir kun davlat muassasa va mahallalarda gazetxonlik kunlarini o‘tkazish;
- davriy bosma nashrlarda davlat organlari va tashkilotlari rahbarlarining, xalq deputatlari viloyat, tuman va shahar Kengashlari deputatlariga taqdim etgan hisobotlarini chop etishni yo‘lga qo‘yish;
- xalq deputatlari tuman, shahar, viloyatlar Kengashlari tomonidan tegishincha tuman, shahar, viloyat ijroiya hokimiyati muassisligidagi davriy bosma nashrlar tahririyatlarining har yarim yillik yakunlari bo‘yicha o‘z faoliyati, bosma nashr sifat ko‘rsatkichlarining o‘sish sur’ati, yuzaga kelishi mumkin muammolar hamda istiqbolli rejalar to‘g‘risida hisobotini amaliy yordam ko‘rsatish maqsadida eshitib borish.
Loyiha muhokamasi 21-maygacha davom etadi, ushbu hujjat loyihasi bo‘yicha taklif va mulohazalarni quyidagi havola orqali bildirish mumkin.
Izoh (0)