Косон тумани ҳокими Асрол Бойқараев карантин пайтида уйи бузилаётгани айтилган гулбоғликлар билан учрашиб, ҳозирда уларни ҳеч ким безовта қилмаслигини билдирган ва аҳолини хотиржам қилган. Бу ҳақда «Дарё»га туман ҳокимлиги ахборот хизмати маълум қилди.
«Дарё»да эълон қилинган мақолада Гулбоғ қишлоғи ҳудудидаги нотурар жойда яшаётган аҳоли муаммоси тилга олиниб, карантинда безовта бўлаётгани ёзилганди.
«Аввало шуни таъкидлаш керакки, 1987—1988 йиллар давомида Деҳқонобод туманининг Бойқўрғон, Ғинжак қишлоқларида яшовчи 50-60 та хонадон вакиллари ушбу ҳудудга кўчириб келинган ва уй-жой қилиб берилган. Ана шундай хонадонларнинг бештаси қаровсиз турган икки қаватли бинони ўзига уй-жой сифатида мослаштириб олган. Аслида мазкур маиший хизмат уйи 1985 йил қуриб битказилган бўлиб, эгалик ҳуқуқи 2011 йил ‘Сирож ўғли Беҳзод’ фермер хўжалигига, 2018 йил фермер хўжалиги раҳбари ва тадбиркор Ренат Юсупов келишувига кўра тадбиркор ихтиёрига ўтган. Бундан кўринадики, аҳоли бу жойни ўзбошимчалик билан эгаллаб олган», — дейилади ҳокимлик муносабатида.
Айтилишича, гулбоғликлар шу кунга қадар ҳокимлик томонидан берилаётган барча таклифларни рад этган.
«Маиший хизмат уйини ўзбошимчалик билан эгаллаб олган фуқаролар муаммосига ягона ечим, уй қуриш учун бошқа ҳудуддан ер ажратишдир, — дейилади туман ҳокимлиги муносабатида. — Ҳокимлик томонидан ажратилган ернинг барча ҳужжатлари тайёрлаб берилади. Аҳолидан фақат уйини қуриб олиш талаб этилади. Уй қурилиши учун ҳомийлар томонидан қурилиш материаллари ҳам етказиб берилиши айтилган. Маҳалла раиси, ҳокимлик масъуллари ва туман ҳокими ўринбосари Собир Эшов бу борада аҳолига бир неча марта таклиф берган. Вазиятни тушунтирган. Аммо меҳнатга лаёқати бор хонадон эгалари бу таклифни рад этган».
Бугун, 6 май куни, гулбоғликлар билан учрашган ҳоким аҳолига кам таъминланганлар учун қурилаётган арзон уй-жойлардан олишни таклиф қилиб, уйларнинг бошланғич тўловини тўлашда ёрдам қилишини айтган.
Қайд этилишича, Косонда 2020 йилда 96 та арзонлаштирилган кўп қаватли уй-жойлар қурилади. Бу уй-жойлар кам таъминланган, боқувчисини йўқотган уйсиз фуқароларга арзон нархда берилади.
Изоҳ (0)