O‘zbekiston Respublikasi Prezidenti Shavkat Mirziyoyev boshchiligida olib borilayotgan tarixiy islohotlar hamda tashqi siyosatdagi ochiqlik, yaxshi qo‘shnichilik va o‘zaro manfaatli hamkorlik yo‘lga qo‘yilishi natijasida oxirgi uch yilda jahon hamjamiyatda mamlakatning obro‘si ko‘tarilib bormoqda. Mazkur holat yurtimiz barqaror rivojlanishi, fuqarolarimizning farovon yashashi uchun muhim ahamiyatga ega.
Yevrosiyo iqtisodiy ittifoqi bilan hamkorlik qilish – xalqimizning, har bir fuqaroning manfaatlariga bevosita ta’sir etuvchi juda jiddiy masala. Shu bilan birga, YEOII bilan kelgusida hamkorlik natijasini baholash, prognoz qilish nihoyatda murakkab va qiyin jarayondir.
O‘zbekiston Xalq demokratik partiyasi fraksiyasi ushbu jiddiy masalada o‘zining tor ma’nodagi elektoral manfaatlaridan voz kechib, birinchi navbatda davlatimiz, xalqimiz va millatimizning umumiy manfaatlaridan kelib chiqish hamda barcha fuqarolarning xohish-irodasiga tayanish lozim, deb hisoblaydi.
Xalq demokratik partiyasi fraksiyasi YEOII bilan hamkorlik qilish yuzasidan quyidagilarni ta’kidlaydi.
Birinchidan, YEOII bilan hamkorlik qilish O‘zbekiston uchun mehnat migratsiyasidagi mavjud muammolarni hal etishda yaxshi imkoniyatlar yaratishi mumkin. Ayniqsa, ushbu tashkilotga kiruvchi mamlakatlarda ishlab yurgan millionlab O‘zbekiston fuqarolarining ijtimoiy himoyasiga ijobiy ta’sir ko‘rsatadi.
Jumladan, YEOIIga kiruvchi mamlakatlarda ishlab yurgan barcha fuqarolarimizga erkin (legal) ishlashga va ishlab topilgan pul o‘tkazilmalari hajmini oshirishga imkon beradi.
Shuningdek, fuqarolarimizning ijtimoiy himoyasi ta’minlanadi, jumladan, pensiya tayinlashda mehnat staji inobatga olinadi, ularning farzandlari ta’lim, tibbiy xizmat olish huquqiga ega bo‘ladi.
Ikkinchidan, bugungi kunda davlatimiz rahbari tomonidan mamlakatimizning eksport salohiyatini oshirish strategik vazifa etib belgilangan. Buning uchun salohiyatli va barqaror iste’mol bozori zarur bo‘ladi.
Ta’kidlash lozimki, YEOII bilan hamkorlik qilish transport xarajatlarini kamaytirish, tarifsiz to‘siqlarni optimallashtirish, to‘qimachilik va trikotaj sanoatining eksport salohiyatini sezilarli darajada oshirishga xizmat qiladi.
Shuningdek, qishloq xo‘jaligida yetishtirilayotgan meva-sabzavot mahsulotlarimiz eksportini amalga oshirishda biz uchun ittifoqqa a’zo mamlakatlar salohiyatli iste’mol bozori bo‘lishi mumkin.
Uchinchidan, tahlillar ko‘rsatmoqdaki, temir yo‘l tashuvlarida eksport-import hajmining o‘sishi 10-15 foizga baholanmoqda. Tovarlar tranzitida yagona tariflardan foydalanilishi natijasida yuk jo‘natuvchilar va qabul qiluvchilarning transport xarajatlari sezilarli darajada kamayishi kutiladi.
Bu eksport va import qilinadigan mahsulotlarning yakuniy qiymatida transport xarajatlari ulushi kamayishiga va pirovard natijada mahsulotlarning tannarxi pasayishiga asos bo‘ladi.
Shu bilan bir qatorda, YEOII bilan hamkorlik qilishdan salbiy holatlar kelib chiqishi mumkin.
Jumladan, Tashkilotga kirish ichki bozorning ochiq bo‘lishiga olib keladi, ya’ni mahalliy ishlab chiqaruvchilarimiz boshqa mamlakatlarda tayyorlangan mahsulotlar sifati bilan raqobat qila olishi kerak bo‘ladi.
Uzoq yillar davomida proteksionizm siyosati orqali qo‘llab-quvvatlab kelingan sanoat korxonalarimizning faoliyati to‘xtab qolishi xavfi mavjud. Raqobatga tayyor bo‘lmagan tarmoqlar va korxonalarimizni to‘xtab qolishi hisobiga katta zarar ko‘rilishi hamda ishsizlar soni oshib ketishi ehtimoli ortadi. Misol uchun, birgina raqobatga tayyor bo‘lmagan ko‘mir ishlab chiqarish sohasini oladigan bo‘lsak, YEOII bilan hamkorlik qilish natijasida 4 ming ish o‘rni qisqarishi mumkin.
O‘zbekiston Xalq demokratik partiyasi fraksiyasi YEOII bilan hamkorlik qilish masalasiga oid bugungi tahlillar, turli prognozlar amalda o‘zini oqlamasligi mumkin, deb hisoblaydi.
Xalqimizning, davlatimizning manfaatlariga bevosita ta’sir etuvchi bunday dolzarb masala yuzasidan qaror qabul qilishda aslo tavakkalchilikka yo‘l qo‘yib bo‘lmaydi.
Demak, YEOIIga a’zo bo‘lishi yoki bo‘lmasligi masalasida barcha ehtimoliy omillarni kuzatib, chuqur tahlil qilib borish lozim.
Buning uchun muammolarni bevosita tashkilotning ichida turib, kuzatib o‘rganish zarur. So‘ngra o‘rganish va kuzatishlar natijalaridan kelib chiqib, kelgusida tegishli qaror qabul qilinishi mumkin bo‘ladi.
Yuqorida keltirilgan barcha omillarni hisobga olib, O‘zbekiston Xalq demokratik partiyasi fraksiyasi O‘zbekistonni Yevrosiyo iqtisodiy ittifoqida kuzatuvchi maqomiga ega bo‘lishini maqsadga muvofiq, deb hisoblaydi.
Ulug‘bek Inoyatov,
Oliy Majlis Qonunchilik palatasidagi
Xalq demokratik partiyasi fraksiyasi rahbari
Ma’lumotlar sheriklik huquqi asosida tayyorlandi
Izoh (0)