O‘tgan bir sutka ichida Rossiyada koronavirus bilan kasallanish bo‘yicha 6198 ta holat qayd etildi. Bu haqda mamlakatning koronavirusga qarshi kurashish tezkor shtabiga tayanib, “RBK” xabar berdi.
Hozirga kelib Rossiyaning 85 mintaqasida koronavirus bilan jami kasallanganlar soni 87 147 kishini tashkil etmoqda.
Xitoy Sog‘liqni saqlash milliy komissiyasining ma’lumotlariga ko‘ra, pandemiya boshlangan Xitoyda koronavirus bilan kasallanganlarning jami soni 82 830 kishiga yetgan (Jons Hopkins universiteti ma’lumotlariga ko‘ra, 83 912 kishi — bunda Gonkong va Makao ham qo‘shib hisoblangan).
Shunday qilib, tezkor shtabning yangi ma’lumotlariga ko‘ra, Rossiya koronavirusga chalinganlar soni bo‘yicha dunyoda to‘qqizinchi o‘ringa chiqib oldi.
O‘tgan bir sutka ichida 23-apreldan buyon birinchi bor kasallikka chalinish bo‘yicha yangi holatlarda kamayish kuzatilgan. Ta’kidlanishicha, bemorlarning 43,4 foizida kasallikning klinik belgilari paydo bo‘lmagan.
O‘tgan bir sutka ichida kasallikka chalinish holatlari eng ko‘p Moskvada aniqlangan — 2871 kishi. Hozirda Rossiya poytaxtida COVID-19 yuqtirib olganlar soni 45 351 kishini tashkil etmoqda. Butun mamlakat bo‘ylab bir sutka ichida 50 kishi koronavirus oqibatida vafot etib, jami qurbonlar soni 794 kishiga yetdi.
Avvalroq Rossiya Mudofaa vazirligining 900 nafarga yaqin harbiy xizmatchisi koronavirus yuqtirib olgani haqida xabar berilgandi.
Mavzuga doir:
Izoh (0)