Rossiya maxsus xizmatlari xodimi Chexiya poytaxti Praganing meri Zdenek Grjib va shaharning 6-tumani ma’muriyati rahbari Ondrjey Kolarj hayotiga suiqasd uyushtirishga urinishda gumon qilinmoqda. Bu haqda Chexiyaning Respect nashriga tayanib, “Exo Moskvi” xabar bermoqda.
Respect’ning Chexiya kuch ishlatar tuzilmalaridagi manbalarga tayanib xabar berishicha, uch hafta oldin Rossiyadan diplomatik pasportga ega erkak kelgan, uni Praga aeroportida Rossiya diplomatik vakolatxonasi avtomobili kutib olib, elchixonaga olib borgan. Yo‘lovchining portfelida o‘limga olib keluvchi ritsin zaharli moddasi bo‘lgan, deb taxmin qilinmoqda.
Chexiya maxsus xizmatlari Rossiyadan shunday odam kelishidan oldindan xabardor bo‘lgan; ularning taxminicha, zaharli modda Praga shahrining 6-tumani ma’muriyati rahbari Ondrjey Kolarj va shahar meri Zdenek Grjibga mo‘ljallangan. Hozirgi vaqtda har ikkala mansabdor kun-u tun qo‘riqlovga olingan.
Rossiya Tashqi ishlar vazirligi hozircha ushbu holat yuzasidan biror izoh bergani yo‘q.
Qayd etishlaricha, Ondrjey Kolarj avvalroq Pragadagi rus general Konev sharafiga o‘rnatilgan haykalni oldirtirish tashabbusi bilan chiqqan edi (haykal 2020-yil 3-aprel kuni demontaj qilingan), Zdenek Grjib esa yaqinda Rossiyaning Pragadagi elchixonasi oldidagi maydonga rossiyalik marhum muxolifatchi Boris Nemsov nomini berish haqidagi qarorni imzolagan edi.
Izoh (0)