Audi kompaniyasi sedan kuzovidagi yangi modelini taqdim etdi. Joriy yilning yoz faslida Yevropa bozorlariga chiqishi kutilayotgan yangi model ikkita benzinli va bitta dizelli variantda taqdim etiladi, deb xabar beradi Motor.
Eslatib o‘tamiz, Audi kompaniyasi mart oyining boshlarida to‘rtinchi avlod A3 xetchbekini taqdim etgandi.
Xuddi xetchbekdagi kabi avlodlar almashganiga qaramay, Audi A3 sedanining g‘ildiraklar bazasi avvalgidek qolgan (2637 millimetr). Biroq tashqi o‘lchamlari o‘zgargan: uzunligi 40 millimetrga, eni — 20, balandligi esa — 10 millimetrga oshgan. Old o‘rindiqlar pastga “egilgan”, shu sababli salon ichida 20 millimetr qo‘shimcha joy paydo bo‘lgan va haydovchining tirsaklariga hech nima xalaqit bermaydi. Yukxona hajmi ham o‘zgarmagan — 425 litr.
Tashqi ko‘rinishidan A3 sedani xetchbekka o‘xshab ketadi. Modelning o‘ziga xosligi olti burchakli Singleframe radiator panjarasi hamda pikselli navigatsiya chiroqlariga ega matritsali faralar. Ular bir-birdan mustaqil ishlovchi 15 ta yorug‘likdiod qismlardan tashkil topgan.
Modelning aerodinamik qarshilik koeffitsiyenti — 0,25 ga teng, bu esa o‘zidan oldingi avlodda 0,04 ga kamroq degani. Sedan saloniga uchinchi avlod MMI “multimediyka” panelga o‘rnatilgan bo‘lib, bu o‘zidan oldingi avlodidan o‘n barobar tez ishlaydi. Xaridorlar onlayn-servislar orqali modelni buyurtma qilishlari mumkin.
Dvigatel gammasidan benzinli 1,5 TFSI (150 ot kuchi va 250 Nm) o‘rin olgan bo‘lib, olti pog‘onali mexanik uzatmalar qutisi yoki S Tronic “roboti” bilan boshqariladi. Ikkinchi holatda motor 48 voltli gibrid sozlamaga va kam yuklama holatida silindrlarni o‘chirib qo‘yish tizimiga ega. Bundan tashqari, dizelli 2,0 TDI (150 ot kuchi va 360 Nm) ham mavjud. Keyinroq kichik benzin agregati o‘rnatilgan sedan ham sotuvga chiqadi.
Yevropa davlatlarida A3 sedaniga buyurtmalarni qabul qilish apreldan boshlanadi. Yoz oyiga borib esa dastlabki xaridorlarga buyurtmalar yetkazib beriladi. Audi A3 sedanining boshlang‘ich narxi — 27 700 yevro.
Izoh (0)