Toshkentda Matiz tuyani urib, uchirib yuborgan video tarqaldi. IIV hodisa tafsilotlarini oshkor qildi

Ichki ishlar vazirligi Toshkentda Matiz yo‘lda yurgan tuyani urib, uchirib yuborgan holat tasvirlangan video yuzasidan ma’lumot berdi.

IIV xabariga ko‘ra, hodisa 2019-yil 11-iyun kuni soat 23:45 atrofida sodir bo‘lgan.

Haydovchi S.K. fuqaro D.L.ga tegishli Matiz rusumli transport vositasini tegishli me’yoriy hujjatlarsiz Toshkent shahri Bektemir tumani hududidagi Oltintopgan ko‘chasi bo‘ylab, Bektemir shohko‘chasi tomonga boshqarib ketayotib, harakat davomida Coca-Cola binosi qarshisida yo‘nalishi bo‘yicha oldinda haydovchiga nisbatan qarama-qarshi yurib kelayotgan ona tuyani urib yuborib, hodisa joyida o‘z vaqtida to‘xtamay, harakatda davom etishi oqibatida yo‘lning o‘ng qatoridagi ikkinchi tuyani ham urib yuborgan va transport vositasi ag‘darilgan”, — deyiladi IIV xabarida.

S.K. tan jarohati olib, shifoxonaga murojaat qilgan. Urilgan birinchi tuya ham jarohat olgan, ikkinchi tuya voqea joyida o‘lgan.

Tuyalar fuqaro M.K.ga tegishli ekanligi aniqlanib, bog‘lab qo‘yilgan joyidan bo‘shalib, avtomobil yo‘liga chiqib qolganligi ma’lum bo‘lgan.

2020-yilning 7-yanvar kuni Bektemir tumani Ma’muriy sudi tomonidan Ma’muriy javobgarlik to‘g‘risidagi kodeksning tegishli moddalariga asosan, fuqaro S.K.ga nisbatan bazaviy hisoblash miqdorining 5 baravari, fuqaro D.L.ga nisbatan BHMning 3 baravari va tuyalar egasi M.K.ga nisbatan BHMning yarim baravari miqdorida jarima jazosi tayinlangan.