Audi компанияси седан кузовидаги янги моделини тақдим этди. Жорий йилнинг ёз фаслида Европа бозорларига чиқиши кутилаётган янги модель иккита бензинли ва битта дизелли вариантда тақдим этилади, деб хабар беради Motor.
Эслатиб ўтамиз, Audi компанияси март ойининг бошларида тўртинчи авлод А3 хэтчбекини тақдим этганди.
Худди хэтчбекдаги каби авлодлар алмашганига қарамай, Audi А3 седанининг ғилдираклар базаси аввалгидек қолган (2637 миллиметр). Бироқ ташқи ўлчамлари ўзгарган: узунлиги 40 миллиметрга, эни — 20, баландлиги эса — 10 миллиметрга ошган. Олд ўриндиқлар пастга «эгилган», шу сабабли салон ичида 20 миллиметр қўшимча жой пайдо бўлган ва ҳайдовчининг тирсакларига ҳеч нима халақит бермайди. Юкхона ҳажми ҳам ўзгармаган — 425 литр.
Ташқи кўринишидан А3 седани хэтчбекка ўхшаб кетади. Моделнинг ўзига хослиги олти бурчакли Singleframe радиатор панжараси ҳамда пикселли навигация чироқларига эга матрицали фаралар. Улар бир-бирдан мустақил ишловчи 15 та ёруғликдиод қисмлардан ташкил топган.
Моделнинг аэродинамик қаршилик коэффициенти — 0,25 га тенг, бу эса ўзидан олдинги авлодда 0,04 га камроқ дегани. Седан салонига учинчи авлод MMI «мультимедийка» панелга ўрнатилган бўлиб, бу ўзидан олдинги авлодидан ўн баробар тез ишлайди. Харидорлар онлайн-сервислар орқали моделни буюртма қилишлари мумкин.
Двигатель гаммасидан бензинли 1,5 TFSI (150 от кучи ва 250 Нм) ўрин олган бўлиб, олти поғонали механик узатмалар қутиси ёки S Tronic «роботи» билан бошқарилади. Иккинчи ҳолатда мотор 48 вольтли гибрид созламага ва кам юклама ҳолатида цилиндрларни ўчириб қўйиш тизимига эга. Бундан ташқари, дизелли 2,0 TDI (150 от кучи ва 360 Нм) ҳам мавжуд. Кейинроқ кичик бензин агрегати ўрнатилган седан ҳам сотувга чиқади.
Европа давлатларида А3 седанига буюртмаларни қабул қилиш апрелдан бошланади. Ёз ойига бориб эса дастлабки харидорларга буюртмалар етказиб берилади. Audi А3 седанининг бошланғич нархи — 27 700 евро.
Изоҳ (0)