Rossiyada koronavirus pandemiya boshlanganidan buyon 405 kishi mazkur kasallikdan vafot etdi. Bu haqda kasallikka qarshi kurash bo‘yicha tezkor shtab ma’lum qildi.
Tezkor shtab bergan ma’lumotlarga ko‘ra, so‘nggi bir sutkada mamlakatda 44 kishi koronavirus sababli vafot etgan. Jumladan, Moskvada 28 ta, Boshqirdistonda to‘rtta, Krasnodar o‘lkasida uchta, Kaluga viloyati va Krasnoyarsk o‘lkasida ikkitadan o‘lim qayd etilgan bo‘lsa, Ivanov, Nijegorod, Arxangelsk viloyatlarida, Chuvashiya va Xabarovsk o‘lkalarida bittadan o‘lim ro‘yxatga olingan.
Mamlakatda 19-aprel, yakshanba kuni, koronavirusga chalinish bo‘yicha 4268 ta yangi holat aniqlangan. Rossiyada ayni paytga qadar koronavirusni yuqtirib olganlarning umumiy soni 47 121 kishiga yetdi. Kasallanganlar mamlakatning 85 ta hududida qayd etilgan. Kasallikdan sog‘ayganlar esa 3446 kishini tashkil qilmoqda.
Rossiya prezidentining matbuot kotibi Dmitriy Peskov joriy haftada mamlakatda koronavirus bilan bog‘liq vaziyat barqarorlashishi va yangi holatlar soni kamayishi mumkinligini aytgan.
Mavzuga doir: Virusolog Rossiya iyun oyiga borib koronavirus ustidan g‘alabaga erishishi mumkinligini ma’lum qildi
Izoh (0)