Россияда коронавирус пандемия бошланганидан буён 405 киши мазкур касалликдан вафот этди. Бу ҳақда касалликка қарши кураш бўйича тезкор штаб маълум қилди.
Тезкор штаб берган маълумотларга кўра, сўнгги бир суткада мамлакатда 44 киши коронавирус сабабли вафот этган. Жумладан, Москвада 28 та, Бошқирдистонда тўртта, Краснодар ўлкасида учта, Калуга вилояти ва Красноярск ўлкасида иккитадан ўлим қайд этилган бўлса, Иванов, Нижегород, Архангельск вилоятларида, Чувашия ва Хабаровск ўлкаларида биттадан ўлим рўйхатга олинган.
Мамлакатда 19 апрель, якшанба куни, коронавирусга чалиниш бўйича 4268 та янги ҳолат аниқланган. Россияда айни пайтга қадар коронавирусни юқтириб олганларнинг умумий сони 47 121 кишига етди. Касалланганлар мамлакатнинг 85 та ҳудудида қайд этилган. Касалликдан соғайганлар эса 3446 кишини ташкил қилмоқда.
Россия президентининг матбуот котиби Дмитрий Песков жорий ҳафтада мамлакатда коронавирус билан боғлиқ вазият барқарорлашиши ва янги ҳолатлар сони камайиши мумкинлигини айтган.
Мавзуга доир: Вирусолог Россия июнь ойига бориб коронавирус устидан ғалабага эришиши мумкинлигини маълум қилди
Изоҳ (0)