Davlat soliq qo‘mitasi davlat xizmatchilarining ish haqini kamaytirish bo‘yicha tavsiyalarni qo‘llab-quvvatladi. Bu haqda qo‘mita matbuot xizmati xabar berdi.
“Ko‘p millatli va hamjihat mamlakatda yashayapmiz. Biz 34 million nafardan ortiqmiz. Davlatimizning qo‘llab-quvvatlashi natijasida 2 yil avval Davlat soliq xizmati organlari xodimlarining lavozim maoshlari 1,7 baravar oshirilgan edi.
Bugun Vatan uchun ana shunday mushkul damlarda davlat soliq xizmati xodimlari mehnat samaradorligi bilan yordam berishga tayyor. Mamlakatda bunday og‘ir damlarga dosh berishda biz, davlat idoralari xizmatchilaridan ko‘ra ko‘proq yordamga muhtoj hamyurtlarimiz bor”, — degan DSQ Kasaba uyushmasi qo‘mitasi raisi Yevgeniy Mahmudov.
Uning aytishicha, soliq organlari xodimlarining aksariyati 4 million so‘mdan ziyod bo‘lgan ish haqi miqdorini kamaytirish to‘g‘risidagi tavsiyalarga tushunish va hamjihatlik bilan munosabat bildirdi.
Davlat organlari xodimlarining ish haqini kamaytirish — budjet xarajatlarini optimallashtirishdagi adolatli va muhim qadam, deb hisoblaydi.
“Biz chetda qolishni istamaymiz. Zero, aynan qiyin vaziyatlarda inson ichki olami va jamiyatning yetukligi, birdamligi namoyon bo‘ladi”, — deya o‘z so‘zlarini yakunlagan Yevgeniy Mahmudov.
Izoh (0)