Uzmobile kompaniyasining mavjud 2G, 3G baza stansiyalari LTE 4G standartiga o‘tkazilishi ma’lum qilindi. Bu haqda AOKA huzurida tashkil etilgan shtabdagi brifingda Axborot texnologiyalari va kommunikatsiyalarini rivojlantirish vazirligi matbuot kotibi Sherzod Ahmatov ma’lumot berib o‘tdi.
“7-aprel kuni ‘O‘zbektelekom’ Uzmobile filiali texnik xizmati Toshkent shahrida uyali aloqa tarmog‘ini modernizatsiya qilish va kengaytirish, shuningdek, LTE qamrov zonasini kengaytirish loyihalari ishlarini yakunladi. Uzmobile texnik jamoasi karantin davrida ham xizmat ko‘rsatmoqda. Loyiha doirasida barcha mavjud 2G, 3G baza stansiyalari LTE 4G standartiga o‘tkaziladi, bu esa o‘z navbatida, Uzmobile abonentlari uchun keng polosali mobil aloqa xizmatlaridan foydalanishda tezlik va imkoniyatlarini oshirishda hissasini qo‘shadi. Ushbu xizmatlar viloyatlarda ham amalga oshiriladi”.
Shuningdek, brifing davomida mobil aloqa xizmatlarining sifati talabga javob bermayotganligi masalasiga ham to‘xtalib o‘tildi. Ushbu masala yuzasidan AKT vazirligi huzurida mobil aloqa operatorlari va provayderlarning murojaatlarini qabul qiluvchi call-markazda 650 dan ortiq xodimlar, 1000 dan ziyod mutaxassislar ishlayotgani, ular 300 dan ziyod avtotransport vositalari hamda himoya anjomlari bilan ta’minlangani aytildi. Mobil aloqa operatorlari tomonidan bugungi kunda sifatni yaxshilash uchun 302 dan ortiq baza stansiyalari modernizatsiya qilingani, mobil aloqa uchun mijozlar avvaldan tuzilgan shartnomada ko‘rsatilgan tezlikda xizmatdan foydalanayotganliklari qo‘shimcha qilindi.Mavzuga doir: O‘zbekiston internet tezligi bo‘yicha jahon reytingida bir oy ichida yana 7 pog‘onaga ko‘tarildi
Izoh (0)