Давлат солиқ қўмитаси Ўзбекистонда давлат хизматчилари иш ҳақининг камайтирилишини қўллаб-қувватлади

Давлат солиқ қўмитаси давлат хизматчиларининг иш ҳақини камайтириш бўйича тавсияларни қўллаб-қувватлади. Бу ҳақда қўмита матбуот хизмати хабар берди.

«Кўп миллатли ва ҳамжиҳат мамлакатда яшаяпмиз. Биз 34 миллион нафардан ортиқмиз. Давлатимизнинг қўллаб-қувватлаши натижасида 2 йил аввал Давлат солиқ хизмати органлари ходимларининг лавозим маошлари 1,7 баравар оширилган эди.

Бугун Ватан учун ана шундай мушкул дамларда давлат солиқ хизмати ходимлари меҳнат самарадорлиги билан ёрдам беришга тайёр. Мамлакатда бундай оғир дамларга дош беришда биз, давлат идоралари хизматчиларидан кўра кўпроқ ёрдамга муҳтож ҳамюртларимиз бор», — деган ДСҚ Касаба уюшмаси қўмитаси раиси Евгений Маҳмудов.

Унинг айтишича, солиқ органлари ходимларининг аксарияти 4 миллион сўмдан зиёд бўлган иш ҳақи миқдорини камайтириш тўғрисидаги тавсияларга тушуниш ва ҳамжиҳатлик билан муносабат билдирди.

Давлат органлари ходимларининг иш ҳақини камайтириш — бюджет харажатларини оптималлаштиришдаги адолатли ва муҳим қадам, деб ҳисоблайди.

«Биз четда қолишни истамаймиз. Зеро, айнан қийин вазиятларда инсон ички олами ва жамиятнинг етуклиги, бирдамлиги намоён бўлади», — дея ўз сўзларини якунлаган Евгений Маҳмудов.