Amerikaning San-Fransisko shahrida yashovchi Tim Xili va uning turmush o‘rtog‘i Robin Lim-Xili 10 yoshli o‘g‘lining tug‘ilgan kunini Kaliforniya janubidagi Karlsbad shahridagi “Legoland” bog‘ida o‘tkazishni niyat qilgan edi, deb yozadi Esquire.
Biroq barcha rejalar koronavirus pandemiyasi tufayli bekor qilindi. Shunga qaramay, ota-ona farzandining tug‘ilgan kunini unutilmas tarzda o‘tkazishning yo‘lini topdi.
Er-xotin o‘t o‘chirish qismida ishlaydigan tanishiga yordam so‘rab murojaat qildi.
Natijada 10 yoshli Kiranning tug‘ilgan kuniga ikkita o‘t o‘chirish mashinasi hamda maxsus himoya kiyimidagi qutqaruvchilar keldi hamda bolaga ko‘plab sovg‘alarni hadya etdi.
Shuningdek, o‘t o‘chiruvchilar ularning zinapoyalari qanday qilib maksimal balandlikka ko‘tarilishini namoyish etdi. Tabrik jarayoni aks etgan videoni oila boshlig‘i Facebook’dagi sahifasiga joylashtirdi.
“Bu favqulodda holat emas. Buning hammasi vaqtni xush o‘tkazish uchun. Qo‘shnilar ehtimol, xavotir olayotgandir. Ularning nima bo‘layotganidan xabari yo‘q”, — deb yozadi Tim Xilli.
Ota, shuningdek, o‘g‘lining kasb borasidagi orzulari o‘zgarib, u o‘t o‘chiruvchi bo‘lishni istab qolishi mumkinligini ham taxmin qildi.
Tim Xillining aytishicha, o‘g‘lining ushbu tug‘ilgan kuni izolyatsiya tufayli esda qolarli o‘tgan.
Izoh (0)