Америкада 10 ёшли боланинг туғилган кунига ўт ўчириш бригадаси келди. Ота-она ўғлини изоляцияда шу тарзда табриклади

Американинг Сан-Франсциско шаҳрида яшовчи Тим Хили ва унинг турмуш ўртоғи Робин Лим-Хили 10 ёшли ўғлининг туғилган кунини Калифорния жанубидаги Карлсбад шаҳридаги «Леголанд» боғида ўтказишни ният қилган эди, деб ёзади Esquire.

Бироқ барча режалар коронавирус пандемияси туфайли бекор қилинди. Шунга қарамай, ота-она фарзандининг туғилган кунини унутилмас тарзда ўтказишнинг йўлини топди.

Эр-хотин ўт ўчириш қисмида ишлайдиган танишига ёрдам сўраб мурожаат қилди.

Натижада 10 ёшли Кираннинг туғилган кунига иккита ўт ўчириш машинаси ҳамда махсус ҳимоя кийимидаги қутқарувчилар келди ҳамда болага кўплаб совғаларни ҳадя этди.

Шунингдек, ўт ўчирувчилар уларнинг зинапоялари қандай қилиб максимал баландликка кўтарилишини намойиш этди. Табрик жараёни акс этган видеони оила бошлиғи Facebook’даги саҳифасига жойлаштирди.

«Бу фавқулодда ҳолат эмас. Бунинг ҳаммаси вақтни хуш ўтказиш учун. Қўшнилар эҳтимол, хавотир олаётгандир. Уларнинг нима бўлаётганидан хабари йўқ», — деб ёзади Тим Хилли.

Ота, шунингдек, ўғлининг касб борасидаги орзулари ўзгариб, у ўт ўчирувчи бўлишни истаб қолиши мумкинлигини ҳам тахмин қилди.

Тим Хиллининг айтишича, ўғлининг ушбу туғилган куни изоляция туфайли эсда қоларли ўтган.