“Bir kun avval gaplashganimda hammasi yaxshi edi”. Ravshan Yo‘ldoshevning qizi Anora uni xotirladi

“Tarona rekords” kompaniyasi asoschisi, marhum Ravshan Yo‘ldoshevning ikkinchi qizi Anora Instagram’dagi sahifasida otasini xotirlab, arxiv suratlari bilan bo‘lishdi.

“2-aprel kuni dadajonim 59 yoshga to‘lgan bo‘lardi. Lekin men endi uni tabriklay olmayman, salomatlik va xursandchilik tilay olmayman. Men u bilan bir kun avval gaplashgandim, u hammasi yaxshiligini aytgandi.

U tug‘uruqxonadagi baxtli kunlar bo‘ladimi yoki begona yurtdagi qiyin damlar bo‘ladimi, hayotining so‘nggi damlarigacha, har doim yonimda bo‘ldi.

Biz qanday qaror qabul qilmaylik, u har doim bizni qo‘llab-quvvatlardi.

Men kun kelib, unga kerak bo‘lgan paytim yonida bo‘lishni orzu qilardim. Lekin shunday kun keldi, lekin men uning yonida bo‘la olmadim.

6 yil avval dadam bilan uzoq vaqtga xayrlashayotganimizni bilgandik, lekin bu bir umrga ekanligini bilmagan edik.

Men o‘shanda uni oxirgi marta ko‘rib turganimni bilmagandim.

Bolaligimdan u mening super qahramonim edi. Esimda, hammaga ‘Dadam ichki ishlar sohasida xizmat qiladi, u podpolkovnik’ deb maqtanardim. Bu so‘zlar menga yod bo‘lib ketganidan hammaga tinmay qaytarardim.

Bugun men o‘z farzandlarimga maktabni oltin medalga bitirib, uni onasiga sovg‘a qilgan, keyin universitetni ham qizil diplom bilan bitirgan bobosidan o‘rnak olishga undayman.

Biroq shu bilan birga u nozik, ijodiy qalb sohibi edi, u judayam iste’dodli inson edi. U qo‘shiqlar yoza olardi, ijod qilardi.

U ham tashqi ko‘rinishi, ham ichki dunyosi go‘zal inson edi. Uning uchun hayotda eng muhimi munosib inson bo‘lish edi.

Men judayam sog‘inaman va achchiq ko‘zyoshlar to‘kaman. Biroq ishonamanki, har bir farzandida uning bir qismi yashaydi. Tug‘ilgan kuningiz bilan, dadajon”, — deb yozadi Anora Ilyosova.

Ma’lumot uchun, Anora Ilyosova marhum Ravshan Yo‘ldoshevning xonanda Loladan keyingi, ikkinchi qizi. U ayni paytda oilasi bilan AQShda yashaydi.

Eslatib o‘tamiz, Shahzodaning sobiq turmush o‘rtog‘i, xonanda Lolaning otasi, “Tarona Rekords” kompaniyasi asoschisi Ravshan Yo‘ldoshev 30-mart kuni yurak xurujidan vafot etgan edi. Marhum hayotining so‘nggi daqiqalarida uning yonida sobiq rafiqasi, xonanda Shahzoda bo‘lgan.