O‘zbekiston xalq artisti Mahmud Namozov “Daryo” muxbiri Mirolim Isajonov bilan suhbatda koronavirus pandemiyasi insoniyatni jipslashtirganini aytib o‘tdi.
“Yaqin o‘tmishda bunday katta masshtabli ko‘ngilsiz vaziyat kuzatilmagandi. 1941-yillardagi urush haqida faqatgina eshitib, kitoblarda o‘qiganmiz xolos. Koronavirus butun insoniyatni bir-biriga jipslashtirdi, larzaga soldi va odamlarni yanada o‘ziga keltirdi.
Oila a’zolarimning barchasi vaziyatdan boxabar. Dunyo va yurtimizdagi holat to‘g‘risidagi muhim xabarlarni internet saytlardan o‘qiyapmiz. Televideniye orqali esa Sog‘liqni saqlash, Ichki ishlar kabi vazirliklar rahbariyati, mutaxassislar bilan bo‘layotgan intervyularni ko‘ryapmiz.
Ochig‘i, hali ko‘p odamlar bu holatga jiddiy qaramayapti. Oldin bitta non yegan bo‘lsak, vaqtinchalik sinov paytida yarimta non yeb turaylik. Hammasiga chidaylik va bir-birimizni o‘zaro ruhan qo‘llab-quvvatlaylik. Prezidentimiz gaplariga, albatta, amal qilishimiz kerak. Har narsada hikmat bor deyishganidek, bu sinovli kunlardan ham hikmat axtarib yashaylik”, — deydi Mahmud Namozov.
Izoh (0)