«Бир кун аввал гаплашганимда ҳаммаси яхши эди». Равшан Йўлдошевнинг қизи Анора уни хотирлади

«Тарона рекордс» компанияси асосчиси, марҳум Равшан Йўлдошевнинг иккинчи қизи Анора Instagram’даги саҳифасида отасини хотирлаб, архив суратлари билан бўлишди.

«2 апрель куни дадажоним 59 ёшга тўлган бўларди. Лекин мен энди уни табриклай олмайман, саломатлик ва хурсандчилик тилай олмайман. Мен у билан бир кун аввал гаплашгандим, у ҳаммаси яхшилигини айтганди.

У туғуруқхонадаги бахтли кунлар бўладими ёки бегона юртдаги қийин дамлар бўладими, ҳаётининг сўнгги дамларигача, ҳар доим ёнимда бўлди.

Биз қандай қарор қабул қилмайлик, у ҳар доим бизни қўллаб-қувватларди.

Мен кун келиб, унга керак бўлган пайтим ёнида бўлишни орзу қилардим. Лекин шундай кун келди, лекин мен унинг ёнида бўла олмадим.

6 йил аввал дадам билан узоқ вақтга хайрлашаётганимизни билгандик, лекин бу бир умрга эканлигини билмаган эдик.

Мен ўшанда уни охирги марта кўриб турганимни билмагандим.

Болалигимдан у менинг супер қаҳрамоним эди. Эсимда, ҳаммага ‘Дадам ички ишлар соҳасида хизмат қилади, у подполковник’ деб мақтанардим. Бу сўзлар менга ёд бўлиб кетганидан ҳаммага тинмай қайтарардим.

Бугун мен ўз фарзандларимга мактабни олтин медалга битириб, уни онасига совға қилган, кейин университетни ҳам қизил диплом билан битирган бобосидан ўрнак олишга ундайман.

Бироқ шу билан бирга у нозик, ижодий қалб соҳиби эди, у жудаям истеъдодли инсон эди. У қўшиқлар ёза оларди, ижод қиларди.

У ҳам ташқи кўриниши, ҳам ички дунёси гўзал инсон эди. Унинг учун ҳаётда энг муҳими муносиб инсон бўлиш эди.

Мен жудаям соғинаман ва аччиқ кўзёшлар тўкаман. Бироқ ишонаманки, ҳар бир фарзандида унинг бир қисми яшайди. Туғилган кунингиз билан, дадажон», — деб ёзади Анора Илёсова.

Маълумот учун, Анора Илёсова марҳум Равшан Йўлдошевнинг хонанда Лоладан кейинги, иккинчи қизи. У айни пайтда оиласи билан АҚШда яшайди.

Эслатиб ўтамиз, Шаҳзоданинг собиқ турмуш ўртоғи, хонанда Лоланинг отаси, «Тарона Рекордс» компанияси асосчиси Равшан Йўлдошев 30 март куни юрак хуружидан вафот этган эди. Марҳум ҳаётининг сўнгги дақиқаларида унинг ёнида собиқ рафиқаси, хонанда Шаҳзода бўлган.