Shamsutdin Rixsiyev, mana 30 yildan oshiq vaqt o‘tibdiki, miniatyurachi rassom sifatida Abulqosim madrasasida ijod qilib kelmoqda. Respublika bo‘ylab ko‘plab shogirdlarni yetishtirib chiqargan mahoratli ustoz sifatida bugungi kunda ham yoshlarga kasb sirlarini erinmasdan o‘rgatishdan charchamaydi. Shamsiddin Rixsiyev asarlarida boy fantaziya olami, nozik did, o‘ziga xos uslubni payqash mumkin. Qanday buyumga bitilgan bo‘lmasin, asarlarining hech bir qahramoni tomoshabinga tik boqmaydi. Balki shuning uchundir, mehnat mahsulini kuzatgan inson borki, ulardagi tasvirlarning naqadar tabiiyligini payqamasligi mumkin emas.
Qahramonimiz 1958-yilda Toshkent shahrida dunyoga kelgan. Yetuk mo‘yqalam sohibining professional faoliyati 1981-yilda Toshkent pedagogika institutining grafik san‘at bo‘limini bitirib chiqqanidan so‘ng boshlangan.
“Dadamning ham ozgina shu san‘atdan xabarlari bo‘lgan, chinni zavodida gul fabrikasida usta bo‘lib ishlab kelganlar. Ularning oldilariga chiqib, bir qancha rassomlar bilan uchrashib, shogird bo‘lib, qiziqib, beshta o‘g‘ildan birgina menga shu rassomchilik kasbi bilan shug‘ullanish nasib qildi. Qolgan aka-ukalarim o‘zlariga ma‘qul kelgan kasb bilan shug‘ullanib, yo‘llarini topib ketishdi.”
Mohir ustaning ushbu fikrlari bir necha yillik xalqaro tajribasi asosida yotgan kuzatuvlariga borib taqaladi. Shamsutdin Rixsiyevning ilk shaxsiy ko‘rgazmasi 1996-yilda Germaniyaning Berlin shahrida tashkil etilgan.
Davlat arbobi va sarkarda Amir Temurning 660-yillik yubileyiga bag‘ishlangan AQShdagi ko‘rgazmada qahramonimiz ikkinchi o‘rin uchun sovrin bilan taqdirlangan. Fransiya, Italiya, Niderlandiya, Rossiyadagi vernisajlar qatnashchisi hisoblanadi. Uning asarlari Gannoverdagi (Germaniya) Expo-2000 Jahon ko‘rgazmasida, Berlindagi vernisajda namoyish etilgan.
2002-yilda bir necha Turk shaharlarida, o‘sha yili Germaniyaning Trier shahrida shaxsiy ko‘rgazmasi o‘tkazilgan.
Ijod olami
“Men, asosan, matoda miniatyura chizaman. Ipakda, eski qog‘ozda ham yaratgan ijod namunalarim bor, teriga chizish amaliyotini esa o‘zimiz boshlaganmiz O‘zbekistonda. Namunalarimizni turistlardan tashqari, yuqori tashkilotlarning vakillari albatta, kelgan mehmonlarga ham sovg‘a qilishadi.
Chizgan asarlarimni ko‘rib aynan menga tegishli ekanligini aytsa bo‘ladi. O‘z uslubim bor. Ijodimda, ko‘z qarashlarini obyektga qaratmayman. Odamga to‘g‘ri qaramaydi. Tik qarasa kompozitsiyaning mazmuniga ta‘sir qiladi. Kartina o‘z hayoti bilan yashasin, deyman. Tomoshabin shunda ikkilanmasdan tomosha qiladi”.
Kasbga muhabbat
“Agar 30 yil avval boshqa kasbni taklif qilishganida ham yo‘q, degan bo‘lar edim. Bu narsani tasavvur qila olmayman. Moliyaviy tomondan qiyinchilik bo‘lgan paytlarda ham kasbimni tashlab yuborishni tasavvur qila olmaganman. Qiynalganimda boshqa ish bilan shug‘ullansam ham ijodni tashlab qo‘ymas edim. Ayrim paytlarda shu kerakmi menga, degan savol beradi inson o‘ziga. Yo‘q, bu kerak, deb qabul qilganman o‘zim uchun. Agar bu san’atda men ishlamasam, ertaga boshqasi ishlamasa, shogirdlarimga nima deb javob beraman, deb savol qo‘yardim o‘zimga. Shuning o‘zi kifoya qilar edi”.
Reklama huquqi asosida.
Izoh (0)