Samarqandda kundoshining o‘g‘lini o‘g‘irlab, tutqunlikda saqlagan ayolga sud hukmi o‘qilib, unga nisbatan 3 yilga ozodlikni cheklash jazosi tayinlandi, deb xabar bermoqda “Daryo” muxbiri Farhod Norbo‘tayev.
Nargiza (ismi o‘zgartirilgan) 2019-yil 7-oktabr kuni soat 16:30 da Qo‘shrabot tumanidagi 48-maktabga borib, maktabning birinchi sinf o‘quvchisi, voyaga yetmagan Sardorni darsdan olib ketib, uyiga qamab qo‘ygan.
Nargiza bu ishni bolaning otasi, sobiq shar’iy eri Umar (ismi o‘zgartirilgan)ga qasddan qilib, unga qo‘ng‘iroq qilib, bolani uyiga olib kelganligini, agar Umar yoniga qaytmasa, bolani o‘ldirishini ma’lum qiladi. So‘ng bolaning onasini chaqirtirib, kundoshi kelgach, bolaning bo‘yniga pichoq tirab, “er meniki, ko‘nmasang, bolangni so‘yib tashlayman”, deb tahdid qilgan.
Kundoshining o‘g‘lini o‘g‘irlagan Nargiza 2018-yilning martidan bolaning otasi Umar bilan yashab kelgan. Biroq Umar 2019-yilning 5-oktabrida Nargizani tashlab ketgan.
IIB xodimlari Nargizaning uyiga borganida, u Sardorni turmush o‘rtog‘i Umarni yoniga qaytarish uchun garov sifatida ushlab turganligini aytgan. Qo‘shrabot tumani IIB xodimlari ayol bilan qilgan muzokaralariga qaramasdan Nargiza bolani ozod qilmagan. Shundan so‘ng IIB xodimlari ayolni ushlab, Sardorni chiqarib olgan.
Jinoyat ishlari bo‘yicha Qo‘shrabot tumani sudi ayolning ushbu qilmishini ko‘rib chiqib, Jinoyat kodeksining 112-moddasi 1-qismi (O‘ldirish yoki zo‘rlik ishlatish bilan qo‘rqitish) bilan sudlanuvchini aybsiz deb topgan. Ushbu modda bilan uning harakatlarida jinoyat tarkibi bo‘lmaganligi sababli uni oqlagan. Biroq Nargiza Jinoyat kodeksining 245-moddasi 2-qismi (Shaxsni garov sifatida tutqunlikka olish) “a” bandida nazarda tutilgan jinoyatni sodir etganlikda aybli deb topilib, 6 yil ozodlikdan mahrum qilingan. Sud sudlanuvchiga nisbatan Jinoyat kodeksining 72-moddasini qo‘llab, tayinlangan ozodlikdan mahrum qilish jazosi shartliga almashtirgan holda 3 yil sinov muddati belgilagan.
Izoh (0)