Самарқандда кундошининг ўғлини ўғирлаб, тутқунликда сақлаган аёлга суд ҳукми ўқилиб, унга нисбатан 3 йилга озодликни чеклаш жазоси тайинланди, деб хабар бермоқда «Дарё» мухбири Фарҳод Норбўтаев.
Наргиза (исми ўзгартирилган) 2019 йил 7 октябрь куни соат 16:30 да Қўшработ туманидаги 48-мактабга бориб, мактабнинг биринчи синф ўқувчиси, вояга етмаган Сардорни дарсдан олиб кетиб, уйига қамаб қўйган.
Наргиза бу ишни боланинг отаси, собиқ шаръий эри Умар (исми ўзгартирилган)га қасддан қилиб, унга қўнғироқ қилиб, болани уйига олиб келганлигини, агар Умар ёнига қайтмаса, болани ўлдиришини маълум қилади. Сўнг боланинг онасини чақиртириб, кундоши келгач, боланинг бўйнига пичоқ тираб, «эр меники, кўнмасанг, болангни сўйиб ташлайман», деб таҳдид қилган.
Кундошининг ўғлини ўғирлаган Наргиза 2018 йилнинг мартидан боланинг отаси Умар билан яшаб келган. Бироқ Умар 2019 йилнинг 5 октябрида Наргизани ташлаб кетган.
ИИБ ходимлари Наргизанинг уйига борганида, у Сардорни турмуш ўртоғи Умарни ёнига қайтариш учун гаров сифатида ушлаб турганлигини айтган. Қўшработ тумани ИИБ ходимлари аёл билан қилган музокараларига қарамасдан Наргиза болани озод қилмаган. Шундан сўнг ИИБ ходимлари аёлни ушлаб, Сардорни чиқариб олган.
Жиноят ишлари бўйича Қўшработ тумани суди аёлнинг ушбу қилмишини кўриб чиқиб, Жиноят кодексининг 112-моддаси 1-қисми (Ўлдириш ёки зўрлик ишлатиш билан қўрқитиш) билан судланувчини айбсиз деб топган. Ушбу модда билан унинг ҳаракатларида жиноят таркиби бўлмаганлиги сабабли уни оқлаган. Бироқ Наргиза Жиноят кодексининг 245-моддаси 2-қисми (Шахсни гаров сифатида тутқунликка олиш) «а» бандида назарда тутилган жиноятни содир этганликда айбли деб топилиб, 6 йил озодликдан маҳрум қилинган. Суд судланувчига нисбатан Жиноят кодексининг 72-моддасини қўллаб, тайинланган озодликдан маҳрум қилиш жазоси шартлига алмаштирган ҳолда 3 йил синов муддати белгилаган.
Изоҳ (0)