O‘zbekiston Prezidenti Shavkat Mirziyoyev Xorazm viloyatiga tashrifi doirasida Xiva shahridagi Ichanqal’a majmuasiga tashrif buyurib, Amir To‘ra madrasasida amalga oshirilgan restavratsiya ishlari bilan tanishdi. Bu haqda Prezident matbuot xizmati xabar berdi.
Qayd etilishicha, Ichanqal’adagi 58 ta tarixiy-madaniy meros obyektidan 17 tasida turli muzeylar joylashgan. Qal’a UNESCO’ning Jahon madaniy merosi ro‘yxatiga kiritilgan.
Bu yerdagi tarixiy obidalarni asrab-avaylash maqsadida restavratsiya va konservatsiya ishlari olib borilmoqda.
Ta’kidlanishicha, Amir To‘ra madrasasining qurilishi 1872-yilda boshlangan. Bu yerda 54 ta hujra bo‘lib, ichki sahni koshin bilan qoplangan. Shuningdek, 2 ta gumbazli xona, qishki va yozgi masjidlar, darsxona bo‘lgan. Chor Rossiyasining Xorazmga hujumi tufayli obida peshtoqlarini pardozlash to‘xtab qolgan. Madrasa Ichanqal’adagi turistik obyektlardan biriga aylangan.
Davlat rahbari qadimiy obidalarning har bir g‘ishti tarixiy ekanini, har bir naqshida ma’no borligini ta’kidladi. Madaniy merosni kelajak avlodlarga yetkazish, buning uchun restavratsiya maktabini rivojlantirish zarurligini qayd etdi.
Shu yerda Xorazm viloyatining ulkan turizm salohiyatidan foydalanish bo‘yicha loyihalar taqdimoti o‘tkazildi.
Ma’lum qilinishicha, 2020—2021-yillarda viloyatda turizmni rivojlantirish dasturi ishlab chiqilgan. Masalan, Xiva tumanida “Anor”, “Anjir”, Yangiariq tumanida “Mennonit qishlog‘i” nomli tematik parklar barpo etilishi rejalashtirilgan.
2019-yil dekabrda Xorazm lazgisi UNESCO’ning Nomoddiy madaniy meros ro‘yxatiga kiritildi. Xorijiy davlatlar vakillari ushbu milliy raqsni o‘rganishga qiziqish bildirmoqda. Shundan kelib chiqib, viloyatda lazgi akademiyasini tashkil etish mo‘ljallangan.
Bugungi kunda viloyatda 600 dan ortiq fermer xo‘jaligi baliqchilik bilan shug‘ullanadi. Ulardan gastronomik turizm yo‘nalishida foydalanish maqsadida 71 ko‘lda xalqaro standartlar darajasida xizmat ko‘rsatishni yo‘lga qo‘yish ko‘zda tutilgan.
Eslatib o‘tamiz, Shavkat Mirziyoyev Xorazm viloyatiga tashrifi doirasida “Hazorasp” erkin iqtisodiy zonasiga tashrif buyurdi hamda u yerdagi yangi to‘qimachilik korxonasini borib ko‘rdi. Shuningdek, Prezident Yangiariqdagi yiliga 5 million dollar daromad keltiradigan issiqxona bilan tanishdi.
Izoh (0)