Iroq bosh vaziri etib tayinlangan Muhammad Tofiq Alaviy yangi hukumat tarkibi bo‘yicha parlamentning ovoz berish jarayonlarida ikkinchi bor o‘ta olmagach, iste’fo so‘radi. Bu haqda Alaviy o‘zining Twitter’dagi sahifasi orqali ma’lum qilgan.
Uning so‘zlariga ko‘ra, prezident Barham Solihga iste’fo so‘rab murojaat yo‘llagan. Xatda u yangi Vazirlar Mahkamasini shakllantira olmagani va mamlakat rahbari hamda Iroq xalqining ishonchini oqlay olmagani uchun uzr so‘ragan.
Al Arabia telekanalining xabar berishicha, hukumat tarkibini shakllantirish jarayonida ba’zi siyosiy partiyalarning saylovchilarga bergan va’dalarini bajarmasliklari va mustaqil Vazirlar Mahkamasini tuzishdan manfaatdor emasliklari borasida bosim o‘tkazilgan.
Shundan so‘ng prezident Solih Iroq parlamentidan 15 kun ichida bosh vazir o‘rniga nomzod ko‘ratishni talab qilgan.
Avvalroq 1-mart kuni Iroq parlamenti yangi hukumat tarkibini tasdiqlaydigan ovoz berish jarayonlari uchun kvorum to‘play olmagan.
Iroqning bundan oldingi bosh vaziri Odil Abdul Mahdiy 2019-yilning dekabr oyida parlamentga iste’fo so‘rab murojaat yo‘llagan edi.
Izoh (0)