Suriyaning SANA axborot agentligi hukumat harbiy havo kuchlarining ikkita samolyoti Idlib viloyati yaqinida turk harbiylarining hujumiga uchraganini xabar qildi. Uchuvchilarning samolyotlardan sakrashga ulgurgani va sog‘-salomat ekani aytilmoqda.
Avval Suriya hukumati harbiy havo kuchlarining Idlib osmonida yo‘q qilingani haqida Turkiyaning TRT va CNN Turk telekanallari xabar qilgandi. CNN Turk telekanali samolyoning viloyat sharqiy qismi Sarakib shahridagi muxolifot kuchlari tomonidan urib tushirilganini bildirgan.
Shuningdek, Twitter’da Idlibda Rossiyaning Su-24 samolyoti urib tushirilgani haqida xabarlar tarqalgandi. Rossiya Mudofaa vazirligi ushbu ma’lumotni inkor qilgan.
SANA agentligi 1-mart, yakshanba kuni, tongda Sarakib shahrida Suriya muxolifoti guruhlari tomonidan aniqlangan Turkiya dronining yo‘q qilingani haqida yozgandi.
Bundan tashqari, Damashq Idlibdagi havo yo‘llarini yopishga qaror qilgan. Ushbu maydonda uchgan har qanday qurilma Suriyaga nisbatan dushmanlik harakati sifatida baholanib yo‘q qilinadi.
Idlibdagi vaziyat Turkiyaning Suriya hukumati qo‘shinlariga qilgan hujumi oqibatida chigallashgan. Fevral oxirida Anqara Suriyaning havodan hujumi oqibatida 30 nafar turk harbiysining halok bo‘lganini tasdiqlagan va ushbu harakatga hujum bilan javob qaytargandi. Rossiya Mudofaa vazirligi halok bo‘lgan turk harbiylarining katta hujum rejalashtirgan terrorchilik guruhlari bilan birga bo‘lganini ma’lum qilgan.
Izoh (0)