Jismoniy tarbiya va sport vazirligi tomonidan “Tokyo 2020” mobil ilovasi ishga tushirildi. Bu haqida vazirlik matbuot xizmati xabar berdi.
Ushbu mobil ilovani yaratishdan ko‘zlangan maqsad — sportchi, murabbiy va vazir o‘rtasida to‘g‘ridan to‘g‘ri onlayn muloqotni yo‘lga qo‘yish hamda mavjud muammo va kamchiliklarni o‘z vaqtida, tezkorlik bilan hal qilishdan iborat.
“Tokyo 2020” mobil ilovasiga dastlabki bosqichda Tokio—2020 Olimpiada o‘yinlariga litsenziyalarni qo‘lga kiritgan hamda olimpiada yo‘llanmalarini qo‘lga kiritish imkoniyati yuqori bo‘lgan sportchilar va ularning murabbiylari ulanishi mumkin. Ular Jismoniy tarbiya va sport vaziri Dilmurod Nabiyev hamda O‘zbekiston milliy olimpiya qo‘mitasi prezidenti Rustam Shoabdurahmonovga o‘zini qiynayotgan savol, muammo yoki takliflar bilan murojaat qilish imkoniyatiga ega bo‘ladi.
U yoki bu sportchi tomonidan yo‘llangan savol, taklif, murojaat yoki shikoyatni bir vaqtda o‘sha sportchining o‘zi bilan birga Jismoniy tarbiya va sport vaziri hamda MOQ prezidenti, ya’ni faqat uch kishigina ko‘rishi mumkin. Mobil ilovada axborotning to‘la maxfiyligi ta’minlangan bo‘lib, bu korrupsion holatlarning oldini olishda ham muhim o‘rin tutadi deyiladi xabarda.
26-fevral, chorshanba kuni Jismoniy tarbiya va sport vazirligida mazkur mobil ilovaning taqdimot marosimi o‘tkazildi. Unda Jismoniy tarbiya va sport vaziri Dilmurod Nabiyev, vazirning birinchi o‘rinbosari Ravshan Ermatov, Milliy olimpiya qo‘mitasi prezidenti Rustam Shoabdurahmonov, vazirlik hamda MOQ mutasaddilari, sport federatsiyalarining rahbarlari va terma jamoalarning bosh murabbiylari ishtirok etdi.
Izoh (0)