Жисмоний тарбия ва спорт вазирлиги томонидан «Тоkyo 2020» мобил иловаси ишга туширилди. Бу ҳақида вазирлик матбуот хизмати хабар берди.
Ушбу мобил иловани яратишдан кўзланган мақсад — спортчи, мураббий ва вазир ўртасида тўғридан-тўғри онлайн мулоқотни йўлга қўйиш ҳамда мавжуд муаммо ва камчиликларни ўз вақтида, тезкорлик билан ҳал қилишдан иборат.
«Тоkyo 2020» мобил иловасига дастлабки босқичда Токио—2020 Олимпиада ўйинларига лицензияларни қўлга киритган ҳамда олимпиада йўлланмаларини қўлга киритиш имконияти юқори бўлган спортчилар ва уларнинг мураббийлари уланиши мумкин. Улар Жисмоний тарбия ва спорт вазири Дилмурод Набиев ҳамда Ўзбекистон миллий олимпия қўмитаси президенти Рустам Шоабдураҳмоновга ўзини қийнаётган савол, муаммо ёки таклифлар билан мурожаат қилиш имкониятига эга бўлади.
У ёки бу спортчи томонидан йўлланган савол, таклиф, мурожаат ёки шикоятни бир вақтда ўша спортчининг ўзи билан бирга Жисмоний тарбия ва спорт вазири ҳамда МОҚ президенти, яъни фақат уч кишигина кўриши мумкин. Мобил иловада ахборотнинг тўла махфийлиги таъминланган бўлиб, бу коррупцион ҳолатларнинг олдини олишда ҳам муҳим ўрин тутади дейилади хабарда.
26 февраль, чоршанба куни Жисмоний тарбия ва спорт вазирлигида мазкур мобил илованинг тақдимот маросими ўтказилди. Унда Жисмоний тарбия ва спорт вазири Дилмурод Набиев, вазирнинг биринчи ўринбосари Равшан Эрматов, Миллий олимпия қўмитаси президенти Рустам Шоабдураҳмонов, вазирлик ҳамда МОҚ мутасаддилари, спорт федерацияларининг раҳбарлари ва терма жамоаларнинг бош мураббийлари иштирок этди.
Изоҳ (0)