26-fevral sanasida Yevropa Chempionlar Ligasi 1/8 finali doirasida ikkita bellashuv bo‘lib o‘tadi. Ulardan biri Fransiyada kechadi. Rudi Garsiya shogirdlari o‘z maydonida Krishtianu Ronaldu yetakchiligidagi “Yuventus”ni qabul qiladi. Quyida uchrashuvga jamoalarga qanday holatda yetib kelgani va o‘zaro uchrashuvlar tarixi haqida ma’lumotlar bilan tanishishingiz mumkin.
Musobaqa yo‘li
“Lion”“Lion” guruh bosqichida qiynalgani rost. Fransuzlar pley-off yo‘llanmasi uchun “Leypsig”, “Benfika” va “Zenit” bilan kurashga kirishdi. Dastlabki turda “Lion” o‘z uyida “Zenit”ni qabul qilib, 1:1 hisobida durang o‘ynadi. Ikkinchi turda safarda “Leypsig”ni 2:0 hisobida mag‘lub etib, uchinchi turda safarda “Benfika”ga 1:2 hisobida imkoniyatni boy berdi. 4-turda esa o‘z uyida portugallarni 3:1 hisobida taslim qildi. Sankt-Peterburgda “Zenit”ga qarshi javob bellashuvida 0:2 hisobida yutqazgan fransuzlar so‘nggi turda o‘z uyida “Leypsig” bilan 2:2 hisobida durang qayd etdi. Jami 8 ochkoga ega bo‘lgan “Lion” “Leypsig”dan so‘ng 2-o‘rin bilan pley-off yo‘llanmasini qo‘lga kiritdi.
“Yuventus”Sarri shogirdlari esa guruh bosqichini sip-silliq o‘tkazdi. “Atletiko”, “Bayer” va “Lokomotiv” joy olgan guruhda Turin superklubi 6 ta o‘yindan 5 tasida g‘alaba qozondi. Faqat “Atletiko”ga qarshi 1-tur o‘yinida durang qayd etildi — 2:2. Qolgan barcha bahslarda Ronaldu va uning jamoadoshlari g‘alabani tantana qildi.
Jamoalarning ayni damdagi holati
“Lion”“Lion” Fransiya chempionatining joriy mavsumini bir tekisda o‘tkazayotgani yo‘q. Buni jamoaning ortda qolgan 26 ta turdan so‘ng 37 ochko bilan 20 ta jamoa orasida 7-o‘rindan (10 ta g‘alaba, 7 ta durang, 9 ta mag‘lubiyat) joy olib turgani orqali ham ko‘rish mumkin. Fevral oyida Rudi Garsiya shogirdlari quyidagi natijalarni qayd etdi:- “Nitssa”—“Lion” 2:1
- “Lion”—“Amyen” 0:0
- PSJ—“Lion” 4:2
- “Lion”—“Strasburg” 1:1
- “Mets”—“Lion” 0:2
“Yuventus”
O‘tgan mavsumlardan farqli o‘laroq “Yuventus” joriy yil A Seriyada jiddiy raqobatga duch kelmoqda. To‘g‘ri, “Yuventus” bir amallab yana peshqadamlikni qaytarib oldi. Biroq uning ortidan “Latsio” va “Inter” izma-iz ta’qib qilib kelmoqda. Turinliklar 25-turdan so‘ng 60 ochko bilan peshqadam bo‘lib turgan bo‘lsa, 2-o‘rindagi “Latsio”da 59, 3-pog‘onadagi “Inter”da esa 54 ochko mavjud.
“Yuventus”ning fevral oyidagi natijalari esa quyidagicha:
- “Yuventus”—“Fiorentina” 3:0
- “Verona”—“Yuventus” 2:1
- “Yuventus”—“Breshia” 2:0
- SPAL—“Yuventus” 1:2
Yo‘qotishlar
“Lion”Rudi Garsiya jamoasida yo‘qotishlar sezilarli darajada. Jumladan, jamoa yetakachisi Memfis Depay uzoq muddatga safdan chiqqanligi bois “Yuventus”ga qarshi bahsda maydonga tushmaydi. Shuningdek, qanot himoyachisi Rafael ham maydonga tushmaydi. Jeff-Rene Adelaid ham Turin klubiga qarshi bahsni o‘tkazib yuboradi.
“Yuventus”
O‘yin qaydnomasidan o‘rin olgan bo‘lsa-da hali jarohatdan to‘liq tuzalgani yo‘q deya aytilayotgan Duglas Kosta “Lion” bilan bahsni katta ehtimol bilan o‘tkazib yuboradi. Shuningdek, uzoq muddatga safdan chiqqan Merih Demiral ham fransuzlarga qarshi bahsda ishtirok etmaydi.
O‘zaro o‘yinlar tarixi
“Lion” va “Yuventus” hozirga qadar 4 marta o‘zaro to‘qnash kelgan. To‘la ustunlik Turin klubi tarafida. 3 g‘alaba va 1 ta durang.Yevropa Ligasi 1/4 finali, 2013/14-yilgi mavsum- “Lion”—“Yuventus” 0:1
- “Yuventus”—“Lion” 2:1
- “Lion”—“Yuventus” 0:1
- “Yuventus”—“Lion” 1:1
O‘yinoldi fikrlar
“Pley-offda faqat yaxshi jamoalar qoldi. Ko‘pchilik “Liverpul” Madridda, PSJ esa Dortmundda g‘alaba qozonadi deb o‘ylagandi. Ammo ular buni amalga oshira olmadi. O‘zimining eng yaxshi o‘yinimizni ko‘rsatishimiz va “Yuventus”ning 100 foiz kuch bilan o‘ynamasligiga umid qilishimiz kerak. “Yuventus”ning maqsadi — Chempionlar Ligasini yutish, bizniki esa bunday emas. Biroq futbolda hamma narsa yuz berishi mumkin”, — deydi “Lion” ustozi Rudi Garsiya.
“Lion” yuqori tezlik va kuchli jismoniy tayyorgarlikka ega jamoa. Bu juda xavfli jamoa, shunday ekan o‘zimining yaxshi o‘yinimizni ko‘rsatishimiz lozim. Agar yaxshilab e’tibor berilsa, bizning yarim himoya rang-baranglikka ega. Oldindan aytib bo‘lmaydi, lekin uch chiziqdan birida jo‘shqinroq harakat qilish bizga foyda beradi deb o‘ylayman. Krishtianu — butun dunyo qadrlaydigan futbolchi. Uning jismoniy holati haqida gapirayotganda, shunchaki statistikasiga qarash kifoya. Ronaldu jismoniy va ruhiy jihatdan qoyilmaqom holatdagi futbolchi”, — deydi “Yuventus” bosh murabbiyi Mauritsio Sarri.
Taxminiy tarkiblar
“Lion”: Lopesh — Markal, Anderson, Denayer, Tete — Auar, Tuzar, Terye, Traore — Dembele, Ekambi
“Yuventus”: Shensni — Aleks Sandro, Kyellini, De Ligt, Danilo — Matyuidi, Bentankur, Remzi — Ronaldu, Iguain, Dibala
Asror Abdunazarov tayyorladi.
Izoh (0)