Ucell kompaniyasi O‘zbekistonda so‘nggi texnologiyalarni birinchilardan bo‘lib tatbiq etuvchi kompaniya sifatida tilga olinadi. Birgina o‘tgan yilning sentabr oyida O‘zbekistonda 5G’ni tatbiq etish bo‘yicha Prezident topshirig‘ini bajarish uchun Coscom MChJ (Ucell savdo belgisi) mobil aloqaning beshinchi avlodini sinash jarayonini birinchilardan bo‘lib boshlagan edi. Ma’lumki, bu texnologiya o‘zining yuqori tezlikda ma’lumot uzatish imkoniyatlari bilan innovatsion hisoblanadi.
Kompaniyaning eng ilg‘or bo‘linmalaridan birin sanaladigan “Ucell-Buxoro” mintaqaviy filiali 20 yilligini nishonlamoqda. Shu munosabat filialda axborot saytlari vakillari, telejurnalistlar hamda blogerlar ishtirokida press-tur bo‘lib o‘tdi. Ishtirokchilar kompaniya bosh ofisi, dillerlik manzili hamda baza stansiyalarida bo‘lishdi.
“Ucell-Buxoro” mintaqaviy filiali savdo menejeri Mehriddin Muhamedovga ko‘ra, kompaniya 2000-yilda o‘z faoliyatini juda kichik, tor va oddiy ofisda boshlagan. O‘shanda filialda atigi 8 nafar xodim ishlagan. Shuningdek, bor-yo‘g‘i bitta asosiy signal qabul qiluvchi stansiya foydalanishga topshirilgan. U ham Buxoro shahar hokimligi binosi tomida o‘rnatilgan. Bugungi kunda esa, birgina o‘tgan yilning o‘zida Buxoro viloyatida yuqori tezlikdagi ma’lumotlarni abonentlarga uzatish uchun 4G standartidagi 60 ta stansiya o‘rnatilgan va foydalanishga topshirildi. Ayni paytda 450 000 dan ortiq abonentlarga ega kompaniyaning 300 dan ortiq asosiy stansiyalari, 160 ta savdo manzillari mavjud. Ularning 30 tasiUcell mono-brend punktlaridir.
− To‘rt yildan beri “Ucell–Buxoro” kompaniyasining call-markaz operatorlari malaka sifatini tekshirish uchun o‘tkaziladigan “Quiz” test sinovlarida respublika bo‘ylab eng yaxshi ko‘rsatkich va birinchilikni egallab kelishmoqda, − deydi M.Muhammedov. − Yaqindan boshlab esa bevosita mijozlar bilan yana-da faolroq ishlay boshladik. Tumanlarda sayyor qabullar o‘tkazmoqdamiz. Bu nafaqat mijozlar bilan yana-da yaqinlikni, balki ularning murojaat va shikoyatlarini to‘g‘ridan-to‘g‘ri o‘rganish va aniqlash imkonini tug‘dirmoqda. Asosan, ayrim muammolar, deyarli mobil aloqa mavjud bo‘lmagan hududlarda yashaydigan abonentlarda uchraydi. Shu nuqtayi nazardan, qamrov tarmoqlarini kengaytirishni va baland ustunlarda yangi-yangi stansiyalar o‘rnatishni ko‘zlayapmiz.
Press-tur ishtirokchilari viloyat Xotin-qizlar qo‘mitasi huzurida tashkil etilgan “Xotin-qizlar tadbirkorlik markazi”da bo‘lishdi. Ushbu markazni tashkil etishda ayollarni ijtimoiy qo‘llab-quvatlash, ularning bandligini ta’minlash, huquqbuzarlik profilaktikasini amalga oshirish borasidagi ishlarni takomillashtirish maqsadi ko‘zlangan. Shunga ko‘ra, profilaktik hisobga olingan xotin-qizlardan doimiy xabar olib turishga mo‘ljallangan Umidqanoti.uz elektron dasturi ishlab chiqilgan. Mazkur tizimni amalga oshirishda“Ucell–Buxoro” kompaniyasi alohida o‘rin tutgan va kompaniya tomonidan elektron dastur maxsus qurilmalar orqali viloyatdagi mavjud jami 567 nafar mahalla mutaxassislari bilan uzviy ishlaydigan planshetlarga o‘rnatilgan.
“Ucell–Buxoro” kompaniyasi 20-yillik tantana munosabati bilan viloyatning 12 ta tuman va shaharlarida mavjud ayollar ijtimoy moslashuv markazlariga Ucell sim-kartalari bilan jihozlangan modem-paketlar sovg‘a qildi. Modem-paketlar elektron kutubxonaga, shu jumladan, O‘zbekiston Savdo-sanoat palatasi, Adliya vazirligi huzuridagi Davlat xizmatlari agentligining rasmiy sahifalariga, tadbirkorlikni yaratish uchun yuridik, axborot va maslahat xizmatlarini ko‘rsatishga qaratilgan boshqa saytlarga ulangan.
Press-tur doirasida OAV vakillari “Ucell–Buxoro” kompaniyasining “Sabina Begim AIR” dilerlik ofisida bo‘lishdi. Salkam o‘n yildan buyon Ucell bilan hamkorlik qilib kelayotgan diler Suhrob Po‘latov jurnalistlarga doimiy ravishda abonentlari bilan muloqotda bo‘lib, iste’molchilarning talab va istaklarini o‘rganishini va o‘z faoliyatidan zavqlanishini bildirdi.
“Ucell–Buxoro” kompaniyasi bosh muhandisi Firdavs Imomov Buxoroda asosiy stansiyalarni ishga tushirish va kompaniyaning kelgusidagi rejalari haqida to‘xtaldi.
Press-tur so‘nggida uzoq yillardan buyon kompaniya faoliyatida munosib hissa qo‘shib kelayotgan xodimlar diplom va sovg‘alar bilan taqdirlandi.
Reklama huquqi asosida.
Izoh (0)