Ucell компанияси Ўзбекистонда сўнгги технологияларни биринчилардан бўлиб татбиқ этувчи компания сифатида тилга олинади. Биргина ўтган йилнинг сентябрь ойида Ўзбекистонда 5G’ни татбиқ этиш бўйича Президент топшириғини бажариш учун Coscom МЧЖ (Ucell савдо белгиси) мобил алоқанинг бешинчи авлодини синаш жараёнини биринчилардан бўлиб бошлаган эди. Маълумки, бу технология ўзининг юқори тезликда маълумот узатиш имкониятлари билан инновацион ҳисобланади.
Компаниянинг энг илғор бўлинмаларидан бирин саналадиган «Ucell-Бухоро» минтақавий филиали 20 йиллигини нишонламоқда. Шу муносабат филиалда ахборот сайтлари вакиллари, тележурналистлар ҳамда блогерлар иштирокида пресс-тур бўлиб ўтди. Иштирокчилар компания бош офиси, диллерлик манзили ҳамда база станцияларида бўлишди.
«Ucell-Бухоро» минтақавий филиали савдо менежери Меҳриддин Муҳамедовга кўра, компания 2000 йилда ўз фаолиятини жуда кичик, тор ва оддий офисда бошлаган. Ўшанда филиалда атиги 8 нафар ходим ишлаган. Шунингдек, бор-йўғи битта асосий сигнал қабул қилувчи станция фойдаланишга топширилган. У ҳам Бухоро шаҳар ҳокимлиги биноси томида ўрнатилган. Бугунги кунда эса, биргина ўтган йилнинг ўзида Бухоро вилоятида юқори тезликдаги маълумотларни абонентларга узатиш учун 4G стандартидаги 60 та станция ўрнатилган ва фойдаланишга топширилди. Айни пайтда 450 000 дан ортиқ абонентларга эга компаниянинг 300 дан ортиқ асосий станциялари, 160 та савдо манзиллари мавжуд. Уларнинг 30 тасиUcell моно-бренд пунктларидир.
− Тўрт йилдан бери «Ucell–Бухоро» компаниясининг call-марказ операторлари малака сифатини текшириш учун ўтказиладиган «Quiz» тест синовларида республика бўйлаб энг яхши кўрсаткич ва биринчиликни эгаллаб келишмоқда, − дейди М.Муҳаммедов. − Яқиндан бошлаб эса бевосита мижозлар билан яна-да фаолроқ ишлай бошладик. Туманларда сайёр қабуллар ўтказмоқдамиз. Бу нафақат мижозлар билан яна-да яқинликни, балки уларнинг мурожаат ва шикоятларини тўғридан-тўғри ўрганиш ва аниқлаш имконини туғдирмоқда. Асосан, айрим муаммолар, деярли мобил алоқа мавжуд бўлмаган ҳудудларда яшайдиган абонентларда учрайди. Шу нуқтаи назардан, қамров тармоқларини кенгайтиришни ва баланд устунларда янги-янги станциялар ўрнатишни кўзлаяпмиз.
Пресс-тур иштирокчилари вилоят Хотин-қизлар қўмитаси ҳузурида ташкил этилган «Хотин-қизлар тадбиркорлик маркази»да бўлишди. Ушбу марказни ташкил этишда аёлларни ижтимоий қўллаб-қуватлаш, уларнинг бандлигини таъминлаш, ҳуқуқбузарлик профилактикасини амалга ошириш борасидаги ишларни такомиллаштириш мақсади кўзланган. Шунга кўра, профилактик ҳисобга олинган хотин-қизлардан доимий хабар олиб туришга мўлжалланган Umidqanoti.uz электрон дастури ишлаб чиқилган. Мазкур тизимни амалга оширишда«Ucell–Бухоро» компанияси алоҳида ўрин тутган ва компания томонидан электрон дастур махсус қурилмалар орқали вилоятдаги мавжуд жами 567 нафар маҳалла мутахассислари билан узвий ишлайдиган планшетларга ўрнатилган.
«Ucell–Бухоро» компанияси 20 йиллик тантана муносабати билан вилоятнинг 12 та туман ва шаҳарларида мавжуд аёллар ижтимой мослашув марказларига Ucell сим-карталари билан жиҳозланган модем-пакетлар совға қилди. Модем-пакетлар электрон кутубхонага, шу жумладан, Ўзбекистон Савдо-саноат палатаси, Адлия вазирлиги ҳузуридаги Давлат хизматлари агентлигининг расмий саҳифаларига, тадбиркорликни яратиш учун юридик, ахборот ва маслаҳат хизматларини кўрсатишга қаратилган бошқа сайтларга уланган.
Пресс-тур доирасида ОАВ вакиллари «Ucell–Бухоро» компаниясининг «Sabina Begim AIR» дилерлик офисида бўлишди. Салкам ўн йилдан буён Ucell билан ҳамкорлик қилиб келаётган дилер Суҳроб Пўлатов журналистларга доимий равишда абонентлари билан мулоқотда бўлиб, истеъмолчиларнинг талаб ва истакларини ўрганишини ва ўз фаолиятидан завқланишини билдирди.
«Ucell–Бухоро» компанияси бош муҳандиси Фирдавс Имомов Бухорода асосий станцияларни ишга тушириш ва компаниянинг келгусидаги режалари ҳақида тўхталди.
Пресс-тур сўнггида узоқ йиллардан буён компания фаолиятида муносиб ҳисса қўшиб келаётган ходимлар диплом ва совғалар билан тақдирланди.
Реклама ҳуқуқи асосида.
Изоҳ (0)